దర్శకుడు రాజమౌళి ఎంతో ప్రతిష్టాత్మకంగా తెరకెక్కిస్తున్న ‘బాహుబలి’ సినిమాకు ఇది కీలకమైన సమయంగా చెప్పుకోవచ్చు. మరో వారం రోజుల్లో సినిమా విడుదలకు సిద్ధమవుతోంది. సినిమాకు సంబంధించిన పోస్ట్ ప్రొడక్షన్ కార్యక్రమాలు దాదాపుగా పూర్తి కావచ్చింది. ఓ పక్క ఈ కార్యక్రమాలన్నింటినీ పూర్తి చేస్తూనే దేశ వ్యాప్తంగా ప్రచార కార్యక్రమాలను భారీ ఎత్తున చేపట్టారు. ప్రభాస్, రానా, అనుష్క, తమన్నాలు ఇప్పటికే దేశ వ్యాప్తంగా ప్రచారం మొదలుపెట్టేయగా, రాజమౌళి గత రెండు రోజుల నుంచి నేరుగా తానే ప్రచారంలోకి దిగారు.
ఈ ఉదయం బాహుబలి సౌండ్ మిక్సింగ్‌కు సంబంధించిన కార్యక్రమాలన్నీ పూర్తయ్యాయ్! రాజమౌళి గత చిత్రాల్లానే ఈ సినిమాలో కీరవాణి మ్యూజిక్ హైలైట్‌గా నిలవనుందని తెలుస్తోంది. నేటితో కీరవాణి తన పాత్రను పూర్తి చేశారు. ఇక హైద్రాబాద్ అన్నపూర్ణ స్టూడియోలో సినిమాటోగ్రాఫర్ సెంథిల్ కుమార్ ఆధ్వర్యంలో డీఐ పనులు జరుగుతున్నాయి. త్వరత్వరగా ఈ పనులన్నింటినీ పూర్తి చేసి రిలీజ్ డేట్‌కి కొన్ని రోజుల ముందే సినిమాను పూర్తి చేయాలని రాజమౌళి భావిస్తున్నారు. జూలై 10న తెలుగు, తమిళ, మళయాల, హిందీ భాషల్లో భారీ ఎత్తున బాహుబలి విడుదల కానున్న విషయం తెలిసిందే!