పవర్ స్టార్ పవన్ కళ్యాణ్ తన అభిమానులకు వరుసగా సినిమాల పండగను కలిపించేందుకు మూడు సినిమాలను మొదలుపెట్టిన విషయం తెలిసిందే. ఇందులో మొదటిదైన ‘కాటమరాయుడు’ ఇప్పటికే సెట్స్‌పైకి వెళ్ళి శరవేగంగా షూటింగ్ జరుపుకుంటోంది. పవన్ సరసన శృతి హాసన్ హీరోయిన్‌గా నటిస్తోన్న ఈ సినిమా ప్రస్తుతం హైద్రాబాద్‌లోని అన్నపూర్ణ స్టూడియోలో కొన్ని కీలక సన్నివేశాల చిత్రీకరణలో ఉంది. పవన్, శృతి హాసన్ తదితరులు ఈ షెడ్యూల్‌లో పాల్గొంటున్నారు.
గత రెండు వారాలుగా అన్నపూర్ణ స్టూడియోలోనే షూటింగ్ జరుపుకుంటోన్న సినిమా, ఎక్కడా ఆగకుండా, శరవేగంగా పూర్తవుతుంది. ఇప్పటివరకూ పూర్తైన షూట్ ఔట్‌పుట్ విషయంలోనూ టీమ్ చాలా హ్యాపీగా ఉందట. నార్త్ స్టార్ ఎంటర్‌టైన్‌మెంట్ పతాకంపై శరత్ మరార్ నిర్మిస్తోన్న ఈ సినిమాకు డాలీ దర్శకత్వం వహిస్తున్నారు. తమిళంలో ఘన విజయం సాధించిన వీరమ్‌కు రీమేక్‌గా ఈ సినిమా తెరకెక్కుతుందన్న ప్రచారం జరుగుతోంది. మార్చి నెలాఖర్లో సినిమా ప్రేక్షకుల ముందుకు రానుంది.