అక్కినేని నాగార్జున ‘బిగ్ బాస్’ హోస్ట్ గా ప్రస్తుతం బిజీగా ఉన్నారు. అయితే బిగ్ బాస్ పూర్తయ్యాక నాగ్ తన కొత్త సినిమాలను పట్టాలెక్కించబోతున్నట్లు తెలుస్తోంది. నాగ్ సూపర్ హిట్ సినిమాల్లో ‘సోగ్గాడే చిన్నినాయన’ కూడా ఒకటి. 2015 లో విడుదలైన ఈ చిత్రం కుటుంబ ప్రేక్షకుల్ని విశేషంగా ఆకట్టుకుని భారీ విజయాన్ని అందుకుంది. ఈ చిత్రంలో నాగార్జున చేసిన బంగార్రాజు పాత్రకు విశేషమైన స్పందన లభించింది. దీంతో దర్శకుడు కళ్యాణ్ కృష్ణ, నాగార్జున – నాగ చైతన్య కాంబినేషన్ లో ఆ చిత్రానికి సీక్వెల్ తీయబోతున్న సంగతి తెలిసిందే.
కాగా డిసెంబర్ నుండి ఈ సినిమా సెట్స్ పైకి వెళ్ళబోతుందట. అలాగే నాగ్ మరో హిందీ సినిమాని కూడా రీమేక్ చేయబోతున్నట్లు సమాచారం. వచ్చే నెలలో తన కొత్త సినిమాలను అధికారికంగా నాగ్ ప్రకటించనున్నారు. ఇక బంగార్రాజు సినిమాలో ఓ కీలక పాత్రలో రమ్యకృష్ణ కూడా నటించనుంది. డిసెంబర్ లో ఈ సినిమాను మొదలుపెట్టి, వచ్చే ఏడాదే వేస‌విలో బంగార్రాజుని విడుద‌ల చేయాలని చిత్రబృందం భావిస్తోంది.