‘సర్దార్ గబ్బర్ సింగ్’ లాంటి పరాజయం తర్వాత పవర్ స్టార్ పవన్ కళ్యాణ్ ఏమాత్రం ఆలస్యంగా చేయకుండా తన కొత్త సినిమాను చాలాకాలం క్రితమే ప్రకటించిన విషయం తెలిసిందే. అయితే దర్శకుడు ఎస్.జె.సూర్య సినిమా నుంచి తప్పుకోవడంతో షూటింగ్ ఆగిపోయింది. ఆ తర్వాత డాలీని దర్శకుడిగా ఎంపిక చేసిన టీమ్ మళ్ళీ ప్రీ ప్రొడక్షన్‌ను కొత్తగా మొదలుపెట్టి ఇప్పటికి ఓ పక్కా స్క్రిప్ట్‌తో సినిమాను సెట్స్‌పైకి తీసుకెళ్ళింది. నేడు హైద్రాబాద్‌లో ఈ సినిమాకు సంబంధించిన ఫస్ట్ షెడ్యూల్ మొదలైంది.
‘కాటమరాయుడు’ అన్న టైటిల్‌తో తెరకెక్కుతోన్న ఈ సినిమా 15రోజుల పాటు హైద్రాబాద్‌లోనే షూటింగ్ జరుపుకోనుంది. ఇక గత కొద్దికాలంగా ఈ సినిమా కోసమే వర్కవుట్స్ చేస్తోన్న పవన్, త్వరలోనే సెట్స్‌లో జాయిన్ కానున్నారు. నార్త్ స్టార్ ఎంటర్‌టైన్‌మెంట్ పతాకంపై శరత్ మరార్ నిర్మిస్తోన్న ఈ సినిమాలో పవన్ కళ్యాణ్ ఓ సరికొత్త లుక్‌లో కనిపించనున్నారు. ఫ్యాక్షన్ నేపథ్యంలో జరిగే ప్రేమకథగా సినిమా ప్రచారం పొందుతోంది.