మెగాస్టార్ చిరంజీవి నటించబోయే 150వ సినిమా కోసం రంగం సిద్ధం అయిపోయింది. మెగా అభిమానులంతా సంవత్సర కాలంగా ఎప్పుడెప్పుడా అని ఎదురుచూస్తున్న రోజు రానే వచ్చింది. రేపు (ఏప్రిల్ 29న) హైద్రాబాద్‌లో మెగాస్టార్ 150వ సినిమా వైభవంగా ప్రారంభం కానుంది. ఇక ఈ సినిమాకు దర్శకత్వం వహించనున్న దర్శకుడు వీవీ వినాయక్, ఈ నేపథ్యంలోనే అంతర్వేదిలోని శ్రీ లక్ష్మి నరసింహ స్వామి ఆలయంలో ప్రత్యేక పూజలు నిర్వహించారు. చిరు సినిమా స్క్రిప్ట్‌ను ఆలయంలో దేవుడి చెంత ఉంచి వినాయక్ ఈ పూజలు నిర్వహించారు.

ఇక ఈ సందర్భంగానే ఆయన మాట్లాడుతూ.. రేపు ప్రారంభం కానున్న ఈ సినిమాకు లక్ష్మీ నరసింహ స్వామి దీవెనలు ఉండాలని, ప్రత్యేకంగా అంతర్వేదికి వచ్చి ఈ పూజలు నిర్వహించినట్లు తెలిపారు. మెగా హీరోలు, సినీ, రాజకీయ ప్రముఖుల సమక్షంలో వైభవంగా లాంచ్ కానున్న ఈ సినిమా మే నెలలో సెట్స్‌పైకి వెళ్ళనుంది. రామ్ చరణ్ ఈ సినిమాను నిర్మిస్తున్నారు.