నటుడు షకలక శంకర్ కథానాయకుడిగా శివ గణేష్ దర్శకత్వంలో తెరకెక్కుతున్న ఇన్వెస్టిగేటివ్ థ్రిల్లర్ చిత్రం ‘మేరంగి జంక్షన్’. యువన్ టూరింగ్ టాకీస్ పతాకంపై రవి కృష్ణ గొల్లు, రాజేష్ గంగునాయుని, పెద్దింటి మోహన రావు, చొక్కపు రాములమ్మ, సీర గణపతి నాయుడు సంయుక్తంగా ఈ చిత్రాన్ని నిర్మిస్తున్నారు.
ఆంధ్రా-ఒడిశా సరిహద్దులోని మేరంగి అనే ప్రాంతంలో జరిగిన యదార్థ సంఘటనల ఆధారంగా ఈ కథను రూపొందించినట్లు చిత్రబృందం వెల్లడించింది. ఇందులో షకలక శంకర్ ఏజెన్సీ ఏరియా పోలీస్ అధికారి పాత్రలో కనిపించనున్నారు.
ఈ సినిమా చిత్రీకరణకు సంబంధించి 47 రోజుల్లో టాకీ భాగంతో పాటు రెండు పాటల చిత్రీకరణను పూర్తి చేశామని దర్శకనిర్మాతలు తెలిపారు. ఇక ఒక పాట, ఒక ఫైట్ చిత్రీకరణ మాత్రమే మిగిలి ఉందని పేర్కొన్నారు. ప్రస్తుతం ఈ చిత్రానికి సంబంధించి పోస్ట్ ప్రొడక్షన్ పనులు వేగంగా జరుగుతున్నాయి.
ఈ చిత్రంలో సాహితీ దాసరి, వినీత కందాల, సంపత్, ప్రభాకర్, రాధా కోహినూర్ ఇతర ముఖ్య పాత్రల్లో నటిస్తున్నారు. అజయ్ పట్నాయక్ సంగీతం అందిస్తుండగా, కిరణ్ చేబ్రోలు ఛాయాగ్రహణ బాధ్యతలు నిర్వహిస్తున్నారు. నిర్మాణానంతర కార్యక్రమాలు పూర్తి చేసి, 2026 చివరి మాసంలో చిత్రాన్ని ప్రేక్షకుల ముందుకు తీసుకురావడానికి సన్నాహాలు చేస్తున్నట్లు నిర్మాణ సంస్థ ప్రకటించింది.
