ఈ వారం థియేటర్స్ లోకి వస్తున్న లేటెస్ట్ చిత్రాల్లో టాలీవుడ్ ప్రముఖ నిర్మాణ సంస్థ సితార ఎంటర్టైన్మెంట్స్ నుంచి వస్తున్న మరో ఆసక్తికరమైన చిత్రం ‘బుట్ట బొమ్మ’ కూడా ఒకటి. ఫార్చ్యూన్ ఫోర్ సినిమాస్ భాగస్వామ్యంతో సితార ఎంటర్టైన్మెంట్స్ నిర్మించిన ఈ ఫీల్ గుడ్ రూరల్ డ్రామాకి సూర్యదేవర నాగ వంశీ, సాయి సౌజన్య నిర్మాతలు. అనిఖా సురేంద్రన్, సూర్య వశిష్ఠ, అర్జున్ దాస్ ప్రధాన పాత్రలు పోషిస్తున్న ఈ చిత్రంతో శౌరి చంద్రశేఖర్ రమేష్ దర్శకుడిగా పరిచయమవుతున్నారు. అయితే మంచి బజ్ ని సంతరించుకున్న ఈ సినిమా ప్రమోషన్స్ లో భాగంగా హీరో సూర్య ఇంటర్వ్యూ ఇవ్వడం జరిగింది. మరి తాను ఎలాంటి అంశాలు పంచుకున్నాడో చూద్దాం.
మీ బ్యాక్గ్రౌండ్ ఏంటి? ఈ సినిమా ఛాన్స్ ఎలా వచ్చింది?
మా నాన్నగారు 30 ఏళ్లకు పైగా సినీ పరిశ్రమలో ఉన్నారు. ఆయనను అందరూ సత్యం గారు అని పిలుస్తారు. రాఘవేంద్రరావు గారు, రాజమౌళి గారు, త్రివిక్రమ్ గారి దగ్గర కోడైరెక్టర్ గా పనిచేశారు. నన్ను నటుడిగా చూడాలనేది ఆయన కోరిక. నాక్కూడా సినిమాలంటే చాలా ఇష్టం. అమెరికాలో చదువు పూర్తి చేసి, కొంతకాలం ఉద్యోగం చేశాక.. ఇక్కడికి వచ్చి సినిమా ప్రయత్నాలు మొదలు పెట్టాను. ఒకసారి నాన్నగారు కప్పేల సినిమాని చూపించి ఇందులోని ఆటో డ్రైవర్ పాత్ర నీకు సరిగ్గా సరిపోతుందని అన్నారు. ఆ తర్వాత ఆ మూవీ రీమేక్ రైట్స్ సితార సంస్థ తీసుకోవడంతో, మా వాళ్లే తీసుకున్నారు అంటూ ఎంతో సంతోషించారు. కానీ నాన్నగారు కోవిడ్ తో మరణించడంతో ఒక ఏడాది పాటు అసలు బయటకు రాలేదు. ఆ తర్వాత ఒకసారి త్రివిక్రమ్ గారిని కలిస్తే ఆయన సూచన మేరకు సితారలో ఆడిషన్ ఇచ్చాను. అలా బుట్టబొమ్మ చిత్రానికి ఎంపిక అయ్యాను. మా నాన్నగారి చివరి కోరిక నెరవేరేలా చేసిన త్రివిక్రమ్ గారికి, సితార సంస్థకి జీవితాంతం రుణపడి ఉంటాను.
సినిమాలోకి రావాలని ఎందుకు అనిపించింది?
అది నాన్న గారి నుంచే వచ్చింది. ఆయన పరిశ్రమలో ఎంతో మంచి పేరు సంపాదించుకున్నారు. నన్ను ఒక మంచి నటుడిగా చూడాలి అనుకున్నారు. నాకు కూడా చిన్నప్పటి నుంచే సినిమాలపై ఆసక్తి ఉంది. నటన నాకు చాలా ఇష్టం. ప్రస్తుతం మా నాన్నగారి కలను నిజం చేస్తుండటం సంతోషంగా ఉంది.
బుట్టబొమ్మ లో భాగం కావడానికి ప్రధాన కారణం?
మలయాళ వెర్షన్ చూసినప్పుడు ఈ సినిమా నాకు చాలా నచ్చింది. ఈ సినిమాలో ఇంత అద్భుతమైన పాత్ర పోషించే అవకాశం రావడం సంతోషంగా ఉంది. నాకు ఎప్పుడూ ఇలాంటి కొత్తదనం ఉన్న పాత్రలు పోషించాలని ఉంటుంది. ఈ సినిమాలో నా పాత్ర కొత్తగా, ఆకట్టుకునేలా ఉంటుంది.
అనిఖా, అర్జున్ దాస్ తో వర్క్ చేయడం ఎలా అనిపించింది?
వారితో కలిసి పని చేయడం సెట్స్ లో ఎంతో సరదాగా ఉండేది. అనిఖా మంచి మనసున్న అమ్మాయి. తనకు తెలుగు రాకపోవడంతో.. కొన్ని కొన్ని సంభాషణల్లో సాయం చేసేవాడిని. అర్జున్ దాస్ అప్పటికే స్టార్. ఆయన తన గొంతుతో ఎందరో అభిమానులను సొంతం చేసుకున్నారు. షూటింగ్ సమయంలో ఆయన నాకు ఎన్నో విలువైన సలహాలు ఇచ్చారు.
సినిమా షూట్ సమయంలో ఛాలెంజింగ్ గా అనిపించింది ఏమిటి?
దర్శకుడు రమేష్ గారు ప్రతి సన్నివేశం, ప్రతి షాట్ మీద చాలా వర్క్ చేస్తారు. మంచి ఔట్ పుట్ కోసం ఆయన ఎన్ని టేక్ లు అయినా తీసుకుంటారు. దాంతో ముఖంలో ఆ అలసట కనిపించకుండా నటించాల్సి వచ్చేది. అలాగే క్లైమాక్స్ షూటింగ్ సమయంలో గాయాలపాలై ఆస్పత్రిలో చేరాను.
ఈ సినిమా విషయంలో ఎలాంటి ప్రశంసలు దక్కాయి?
సినిమా మొదలు కావడానికి ముందు.. ఇది నీ మొదటి సినిమా అని ప్రేక్షకులకు అనిపించకుండా ఉండేలా నటించాలని దర్శకుడు రమేష్ గారు అన్నారు. ఆయన మాటలను దృష్టిలో పెట్టుకొని ఎంతో కష్టపడ్డాను. ఇటీవల మా దర్శక నిర్మాతలు సినిమా చూసి నా నటనను మెచ్చుకోవడంతో చాలా ఆనందం కలిగింది.
మీకు ఏ జోనర్ సినిమాలు ఇష్టం?
బుట్టబొమ్మ అనుభవంతో నేను థ్రిల్లర్, రొమాంటిక్ సినిమాలకు సరిపోతాను అనిపిస్తుంది. కేవలం హీరోగానే చేయాలి అనుకోవడం లేదు. ఎలాంటి పాత్రలైనా చేయడానికి సిద్ధంగా ఉన్నాను.
ఫైనల్ గా మీ ఫ్యూచర్ ప్రాజెక్ట్స్ ఏంటి?
నాకు సహజత్వానికి దగ్గరగా ఉండే సినిమాలు అంటే ఇష్టం. అలాంటి సినిమాల్లోనే ఎక్కువగా నటించాలి అనుకుంటున్నాను. బుట్టబొమ్మ టీజర్ విడుదలయ్యాక పలువురు నూతన దర్శకులు నన్ను సంప్రదించారు. మరికొన్ని కథలు విని, బుట్టబొమ్మ విడుదల తర్వాత నిర్ణయం తీసుకోవాలి అనుకుంటున్నాను.