మెగాస్టార్ చిరంజీవి హీరోగా రామ్ చరణ్ కీలక పాత్రలో తెరకెక్కిన లేటెస్ట్ మూవీ ఆచార్య. కొరటాల శివ దర్శకత్వంలో భారీ ఎత్తున రూపొందిన ఈ మూవీ బాక్సాఫీస్ దగ్గర పరాజయం పాలయింది. తొలిసారిగా మెగాస్టార్, మెగాపవర్ స్టార్ కలిసి నటించిన ఈ మూవీ ఫెయిల్ అవడంతో మెగా ఫ్యాన్స్ ఎంతో నిరాశ చెందారు. అయితే ఈ మూవీలో ధర్మస్థలి కి సంబంధించి ఒక భారీ సెట్ ని రూపొందించారు యూనిట్. సినిమా ఎప్పుడో పూర్తి అయి రిలీజ్ అయినప్పటికీ కూడా ఇంకా ఆ సెట్ ని అలానే ఉంచేశారు.
కాగా నేడు ఆ సెట్ లో ఒక్కసారిగా మంటలు చెలరేగడంతో అది గమనించిన స్థానికులు వెంటనే దగ్గర్లోని వట్టినాగుల పల్లి ఫైర్ స్టేషన్ కి సమాచారం అందించారు. వెనువెంటనే అక్కడికి చేరుకున్న ఫైర్ సిబ్బంది మంటలను అదుపుచేసినట్లు తెలుస్తోంది. అయితే కోకాపేట లేక్ వద్ద ఉన్న ఆ సెట్ లో ఒక్కసారిగా అగ్నిప్రమాదం జరగడానికి గల కారణాలు మాత్రం తెలియాల్సి ఉంది. ఇక ప్రస్తుతం మెగాస్టార్ చిరంజీవి, మెహర్ రమేష్ తో భోళా శంకర్ మూవీ చేస్తుండగా శంకర్ దర్శకత్వంలో రామ్ చరణ్ తన కెరీర్ 15వ మూవీ చేస్తున్నారు.