సాయి కృష్ణ, యష్న, అభిజిత్ ప్రధాన పాత్రల్లో నటించిన ‘ఇంప్యూర్’ సినిమా ప్రీ రిలీజ్ వేడుకలో చిత్ర ట్రైలర్తో పాటు పాటను విడుదల చేశారు. ఈ కార్యక్రమానికి దర్శకురాలు నందిని రెడ్డి ముఖ్య అతిథిగా హాజరయ్యారు. వారాహి మల్లిపాముల, శ్రీదేవి మల్లిపాముల నిర్మించిన ఈ చిత్రానికి నిశాంతి ఇవని దర్శకత్వం వహించారు.
పిల్లల కలలను తల్లిదండ్రులు ప్రోత్సహించినప్పుడే వారు ఏదైనా సాధించగలరని నందిని రెడ్డి పేర్కొన్నారు. నిశాంతికి ఆమె తల్లి అందించిన సహకారాన్ని ఈ సందర్భంగా ఆమె ప్రస్తావించారు. దర్శకుడు కృష్ణవంశీ సూచనతో పాటు, దర్శకురాలు నిశాంతితో ఉన్న పాత పరిచయం వల్లే తాను ఈ కార్యక్రమానికి వచ్చినట్లు చెప్పారు.
ఒక పెళ్లి రద్దయిన తర్వాత ముగ్గురి జీవితాల్లో ఎదురైన పరిస్థితుల నేపథ్యంలో ఈ కథ నడుస్తుందని దర్శకురాలు నిశాంతి వివరించారు. సంధ్య, ప్రణవ్, ధీర అనే మూడు ప్రధాన పాత్రల చుట్టూ కథ తిరుగుతుందని చెప్పారు. వారాహి చెప్పిన కథ నచ్చడంతో ఈ ప్రాజెక్ట్ను రూపొందించినట్లు తెలిపారు.
సినిమాలో తాను సంధ్య పాత్రలో కనిపించనున్నట్లు నటి యష్న తెలిపారు. నిర్మాత రాజీ పడకుండా చిత్రాన్ని నిర్మించారని కథానాయకుడు సాయి కృష్ణ పేర్కొన్నారు. ఈ కార్యక్రమంలో నటుడు పృథ్వీ రాజ్, నిర్మాత రామ్కీ తదితరులు పాల్గొన్నారు.
