యంగ్ టైగర్ ఎన్టీఆర్ హీరోగా నటిస్తోన్న ‘జనతా గ్యారెజ్’ సినిమా రోజురోజుకీ ఆసక్తి పెంచేస్తూ విడుదలకు సిద్ధమవుతోన్న విషయం తెలిసిందే. ‘మిర్చి’, ‘శ్రీమంతుడు’ సినిమాలతో దర్శకుడిగా తనదైన బ్రాండ్ సృష్టించుకున్న కొరటాల శివ తెరకెక్కిస్తోన్న ఈ సినిమాపై ఇప్పటికే ఉన్న అంచనాలను ఈమధ్యే విడుదలైన ట్రైలర్, ఆడియో తారాస్థాయికి చేర్చాయి. ఇక మళయాల సూపర్ స్టార్ మోహన్ లాల్ ఓ ప్రధాన పాత్రలో నటిస్తోన్న ఈ సినిమా మళయాలంలోనూ డబ్ అవుతోన్న విషయం తెలిసిందే.
మోహన్ లాల్‌కు మళయాలంలో ఉన్న మార్కెట్ దృష్ట్యా అక్కడ పెద్ద ఎత్తున సినిమా విడుదలను ప్లాన్ చేస్తున్నారు. ఈ క్రమంలోనే ఈ నెల 26న కొచ్చిలో మళయాల ఆడియో ఆవిష్కరణను పెద్ద ఎత్తున చేపడుతున్నారు. మైత్రీ మూవీ మేకర్స్ నిర్మిస్తోన్న ఈ సినిమా ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోంది. సెప్టెంబర్ 2న విడుదల కానున్న ఈ సినిమాలో ఎన్టీఆర్ సరసన సమంత, నిత్యా మీనన్‌లు హీరోయిన్లుగా నటించారు.