ఇటీవల దయా వెబ్ సిరీస్ ద్వారా ఆడియన్స్ ముందుకి వచ్చి మంచి సక్సెస్ సొంతం చేసుకున్నారు ప్రముఖ నటుడు జెడి చక్రవర్తి. ఇక తాజాగా ఆయన నటించి తెరకెక్కించిన సినిమా హూ. శుభ రక్ష, నిత్య హీరోయిన్స్‌గా తెరకెక్కిన హూ ట్రైలర్‌ విడుదల కార్యక్రమం తాజాగా హైదరాబాద్‌ ప్రసాద్‌ ల్యాబ్‌లో సినీ ప్రముఖుల సమక్షంలో వైభవంగా జరిగింది. ప్రస్తుతం పోస్ట్‌ ప్రొడక్షన్‌ కార్యక్రమాలను పూర్తి చేసుకున్న హు విడుదలకు సిద్ధమైంది. అక్టోబర్ మొదటి వారంలో ఈ సినిమా ప్రేక్షకుల ముందుకి రానుందని తాజాగా మేకర్స్ ప్రకటించారు. ఈ సందర్భంగా చిత్ర నిర్మాత రెడ్డమ్మ కె. బాలాజీ మాట్లాడుతూ జెడి చక్రవర్తి స్వీయ దర్శకత్వంలో తెలుగు, కన్నడ భాషల్లో రూపుదిద్దుకున్న ఎమోషనల్‌ థ్రిల్లర్‌ మూవీ హూ. ఇందులో యాక్షన్‌ సన్నివేశాలు ఒళ్లు గగుర్పొడిచే రీతిలో చిత్రీకరించాం.
అలాగే అనేక థ్రిల్లింగ్‌ అంశాలు కూడా ఉన్నాయి. క్లాస్‌, మాస్‌ ప్రేక్షకులను అందరినీ అలరించేలా కంటెంట్‌ విషయంలో చాలా జాగ్రత్తలు తీసుకున్నాం. తప్పకుండా ప్రేక్షకులను మెప్పిస్తుందనే నమ్మకం ఉంది. ఇటీవలే పోస్ట్‌ ప్రొడక్షన్‌ పనులు పూర్తయ్యాయి. అక్టోబర్ తొలి వారంలో విడుదల చేయటానికి సన్నాహాలు చేస్తున్నాం అన్నారు. మీ అందరి ఆశీర్వాదాలు మా సినిమాపై ఉండాలని కోరుకుంటున్నట్లు ఆయన తెలిపారు. ఇంకా ఈ సినిమాలో వినయ్‌ ప్రసాద్‌, విజయ్‌ చందర్‌, సునీల్‌ పూర్ణిక్‌, రమేష్‌ పండిట్‌, హర్షిత, ఉగ్రం రవి, శరణ్య, సనత్‌, నాగేంద్ర తదితరులు కీలక పాత్రలు పోషించారు. ఇక ఈ సినిమాకి సంగీతాన్ని ఈశ్వర్‌ చంద్‌, ఎడిటింగ్‌ ని జెడి చక్రవర్తి, కెమెరాని ఎం.బి. అల్లికట్టి, విజువల్‌ ఎఫెక్ట్స్‌ ని చందు అందించారు.