ప్రముఖ నేపథ్య గాయని సునీత కుమారుడు ఆకాష్ గోపరాజు, భైరవి అర్ధ్యా జంటగా నటించిన చిత్రం ‘కొత్త మలుపు’. శివ వరప్రసాద్ కేశనకుర్తి దర్శకత్వంలో తధాస్తు క్రియేషన్స్ పతాకంపై తాటి బాలకృష్ణ ఈ చిత్రాన్ని నిర్మించారు. తాజాగా ఈ సినిమా ట్రైలర్ను ప్రముఖ దర్శకుడు ఏ. కోదండరామిరెడ్డి విడుదల చేసి చిత్రబృందానికి శుభాకాంక్షలు తెలిపారు. ట్రైలర్ ఆకట్టుకునేలా ఉందని, సినిమా మంచి విజయం సాధించాలని ఆయన ఆకాంక్షించారు. మైత్రీ మూవీ డిస్ట్రిబ్యూటర్స్ ద్వారా ఈ చిత్రం జూన్ 12న థియేటర్లలో విడుదల కానుంది.
గ్రామీణ నేపథ్యం, కోనసీమ అందాలతో రొమాంటిక్ లవ్, సస్పెన్స్ ఎంటర్టైనర్గా ఈ సినిమాను రూపొందించినట్లు దర్శకుడు శివ వరప్రసాద్ తెలిపారు. ఇందులో హీరో, హీరోయిన్లు బావ–మరదళ్లుగా కనిపించనున్నారు. హాస్యం, కుటుంబ భావోద్వేగాలతో తెరకెక్కిన ఈ చిత్రం ప్రేక్షకులకు సరికొత్త అనుభూతిని పంచుతుందని చిత్రబృందం ఆశాభావం వ్యక్తం చేసింది.
ఈ సినిమాలో రఘుబాబు, పృథ్వీరాజ్, ప్రభావతి, మహేందర్ తదితరులు కీలక పాత్రలు పోషించారు. యశ్వంత్ నాగ్ ఈ చిత్రానికి సంగీతం అందించగా, జవహర్ రెడ్డి, సుమంత్ కాచర్ల సినిమాటోగ్రాఫర్లుగా వ్యవహరించారు.
