శ్రీ వెంకటేశ్వర సినిమాస్ బ్యానర్పై ప్రొడక్షన్ నెం. 10గా రూపొందనున్న కొత్త చిత్రం అధికారికంగా ప్రారంభమైంది. శ్రీ పుష్కూర్ రామ్మోహన్ రావు, శ్రీ భరత్ నారంగ్ సంయుక్తంగా నిర్మిస్తున్న ఈ చిత్రానికి ‘రాజు వెడ్స్ రాంబాయి’ ఫేమ్ సాయిలు కాంపాటి దర్శకత్వం వహిస్తున్నారు.
హైదరాబాద్లోని సికింద్రాబాద్ గణేష్ టెంపుల్లో చిత్ర యూనిట్ మరియు పలువురు ప్రముఖుల సమక్షంలో ఈ సినిమా పూజా కార్యక్రమాలతో ఘనంగా ప్రారంభమైంది. ఈ వేడుకలో సదానంద్ చిత్ర బృందానికి స్క్రిప్ట్ను అందించగా, ప్రముఖ దర్శకుడు శేఖర్ కమ్ముల కెమెరా స్విచ్ ఆన్ చేశారు. యంగ్ హీరో అడివి శేష్ ముహూర్తపు షాట్కు క్లాప్ కొట్టగా, దర్శకుడు సాయిలు కాంపాటి మొదటి షాట్ను డైరెక్ట్ చేశారు.
’మేమ్ ఫేమస్’ ఫేమ్ సుమంత్ ప్రభాస్ హీరోగా నటిస్తున్న ఈ చిత్రం ఒక చిన్న టౌన్ బ్యాక్డ్రాప్లో సాగే ఆహ్లాదకరమైన ప్రేమకథగా తెరకెక్కనుంది. సుమంత్ ప్రభాస్ ఎంతో సందడిగా, వినోదాత్మకంగా ఉండే యువకుడి పాత్రలో కనిపించనున్నారు. త్వరలోనే ఈ సినిమా రెగ్యులర్ షూటింగ్ ప్రారంభం కానుండగా, మిగిలిన నటీనటుల వివరాలను మేకర్స్ త్వరలోనే ప్రకటించనున్నారు.
