తెలుగు సినిమాకు పరిచయం అవుతున్న మరో నూతన కథానాయిక తాన్యా రవిచంద్రన్. ‘రాజా విక్రమార్క’ సినిమాలో కార్తికేయకు జంటగా నటించారు. ప్రముఖ దర్శకుడు వి.వి. వినాయక్ శిష్యుడు శ్రీ సరిపల్లి దర్శకుడిగా పరిచయం చేస్తూ… శ్రీ చిత్ర మూవీ మేకర్స్ పతాకంపై ఆదిరెడ్డి .టి సమర్పణలో ’88’ రామారెడ్డి నిర్మించిన సినిమా ‘రాజా విక్రమార్క’. స్పై యాక్షన్ ఎంటర్టైనర్ ఇది. ఇందులో ఎన్.ఐ.ఏ ఏజెంట్ పాత్రలో కార్తికేయ నటించారు. నవంబర్ 12న సినిమా విడుదల కానుంది. ఈ సందర్భంగా మీడియాతో తాన్యా రవిచంద్రన్ ఇచ్చిన ఇంటర్వ్యూలో ఆమె ఎలాంటి విషయాలు పంచుకుందో చూద్దాం.

మీది కూడా సినిమా బ్యాక్గ్రౌండ్ అందుకే సినిమాల్లోకి వచ్చారా వేరే కారణం ఉందా?

నేను చెన్నైలో పీజీ చేస్తున్న సమయంలో తమిళ పరిశ్రమ నుంచి కొన్ని అవకాశాలు వచ్చాయి. ‘ముందు పీజీ పూర్తి చెయ్. తర్వాత సినిమాలు చేయొచ్చు’ అని మా పేరెంట్స్ చెప్పారు. ఒక్క సినిమా చేస్తానని చెప్పను. అయితే వరుస అవకాశాలు రావడంతో తమిళంలో వెంట వెంటనే మూడు సినిమాలు చేశా. ఆ మూడు సినిమాలు పూర్తి చేశాక… పీజీ (ఎంఏ హ్యూమన్ రిసోర్స్ మేనేజ్‌మెంట్ – హెచ్ఆర్‌) కంప్లీట్ చేసి మళ్లీ సినిమాల్లోకి వచ్చాను.

మరి ఈ సినిమాలో ఛాన్స్ ఎలా వచ్చింది?*

దర్శకుడు శ్రీ సరిపల్లి ముందు ఫోన్ చేశారు. తర్వాత చెన్నై వచ్చి కథ చెప్పారు. కథతో పాటు అందులో నా పాత్ర కూడా బాగా నచ్చింది. కథలో హీరోయిన్ రోల్ చాలా ఇంపార్టెంట్. అందుకనే ఓకే చెప్పేసాను.

ఈ సినిమాలో మీ రోల్ కోసం ఏమన్నా చెప్పండి?

ఈ సినిమాలో నా రోల్ పేరు కాంతి. ఆ అమ్మాయి కాలేజీకి వెళుతుంది. అలాగే, తను భరతనాట్యం డాన్సర్. నేను గత పదిహేనేళ్లుగా క్లాసికల్ డాన్స్ నేర్చుకుంటున్నాను. క్యారెక్టర్ పరంగానూ కాంతి చాలా స్ట్రాంగ్. హోమ్ మినిస్టర్ కుమార్తె అయినప్పటికీ కాంతి చాలా సింపుల్ గా ఉంటుంది. హీరోయిన్ పాత్రలో లక్షణాలు నచ్చాయి.

కార్తికేయ తో వర్క్ ఎలా అనిపించింది?

తను వెరీ స్వీట్ అండ్ ఫ్రెండ్లీ. అతని నటన చాలా నేచురల్ గా ఉంటుంది. దాంతో కో-ఆర్టిస్టులు కూడా చక్కగా నటించగలరు. కార్తికేయతో వర్కింగ్ ఎక్స్‌పీరియ‌న్స్ బావుంది. అతనితో పాటు సాయి కుమార్, తనికెళ్ల భరణితో స్క్రీన్ షేర్ చేసుకోవడం గౌరవంగా భావిస్తున్నాను.

జెనరల్ గా కమర్షియల్ సినిమాలో హీరోయిన్లకు ఇంపార్టెన్స్ తక్కువ ఈ సినిమాలో మీ పాత్రకు ఎంత ఇంపార్టెన్స్ ఉంది?

నేను మాత్రం ఈ సినిమా అంతా ఉంటాను. నాది చాలా ప్రామినెంట్ రోల్. సినిమా కథకి తగ్గట్టుగా వచ్చి వెళుతూ ఉంటుంది.

సినిమా షూటింగ్ చేసేటప్పుడు తెలుగు మాట్లాడటంలో ఇబ్బంది అయ్యిందా?

ముందు కొంత భయపడ్డాను. షూటింగ్ స్టార్ట్ కావడానికి కొన్ని రోజుల ముందు నేను హైదరాబాద్ వచ్చాను. దర్శకుడు శ్రీ నాకు ఇంగ్లిష్ స్క్రిప్ట్ ఇచ్చారు. అలాగే, డైలాగులకు అర్థం వివరించడంతో పాటు తెలుగు డైలాగులకు ఇచ్చాడు. నా పాత్ర డైలాగులు మాత్రమే కాదు. సన్నివేశంలో మిగతా ఆర్టిస్టుల డైలాగులు కూడా ఇచ్చారు. అందువల్ల, నా పని ఈజీ అయ్యింది.

సినిమా మ్యూజిక్ కోసం చెప్పండి?

ఈ సినిమాకి ప్రశాంత్ ఆర్. విహారి మంచి సాంగ్స్ ఇచ్చారు. ఆల్రెడీ తొలి సాంగ్ విని ఉంటారు కదా! బ్యాక్గ్రౌండ్ స్కోర్ కూడా బాగా చేశారని విన్నాను.

ఈ సినిమాని మీరు చూశారా? మీకు చెప్పినట్టు వచ్చిందా?

నేను ఇంకా సినిమా చూడలేదు. కానీ, షూటింగ్ చేశా కదా! నాకు దర్శకుడు శ్రీ ఏదైతే కథ, సన్నివేశాలు చెప్పాడో, అదే తీశాడు. ఫిల్మ్ మేకింగ్ విషయంలో ఎక్కడా కాంప్రమైజ్ కాలేదు.

మీరు సినిమాల్లోకి వస్తానని చెప్పినప్పుడు మీ తాతయ్య రవిచంద్రన్ ఏమన్నారు?

దురదృష్టవశాత్తూ నేను సినిమాల్లోకి వస్తానని ఆయనకు తెలియకముందే తిరిగిరాని లోకాలకు వెళ్లిపోయారు. తాతయ్య చాలా హార్డ్ వర్కింగ్. ఆయనలో అంకితభావం, క్రమశిక్షణ ఎక్కువ. వ్యక్తిగతంగా నేను ఆ మూడు లక్షణాలు నేర్చుకున్నాను. చిన్నతనం నుంచి నాకు సినిమాలు అంటే ఆసక్తి. కానీ, మా పేరెంట్స్ చాలా స్ట్రిక్ట్ గా ఉండటం తాతయ్యకు ఎప్పుడూ చెప్పలేదు. ఇప్పుడు తాతయ్య ఉండుంటే నేను చాలా హ్యాపీగా ఫీలయ్యేదాన్ని.