సూపర్ స్టార్ రజినీకాంత్ సినిమా అంటే తమిళనాడుతో పాటు యావత్ దేశం మొత్తం ప్రభంజనమే. అంతటి పెద్ద అభిమానగణం రజినీకాంత్ సొంతం. భారత సినిమా చరిత్రలోనే రజినీ నటిస్తున్న 2.0 చిత్రం టెక్నికల్ వండర్ గా తెరకెక్కుతోంది. సంచలన దర్శకుడు శంకర్ ఈ చిత్రాన్ని తెరకెక్కిస్తున్నారు. ఘనవిజయం సాధించిన రోబో చిత్రానికి ఇది సీక్వెల్ అన్న విషయం తెలిసిందే. బాలీవుడ్ స్టార్ హీరో అక్షయ్ కుమార్ ఇందులో ప్రతినాయకుడిగా నటిస్తున్నాడు. బ్రిటిష్ సుందరి అమీ జాక్సన్ హీరోయిన్.
ఇన్ని విశేషాలు ఉన్న ఈ చిత్రం కోసం అభిమానులు ఎంతో ఆసక్తిగా ఎదురుచూస్తున్నారు. కాగా ఈ చిత్ర బిజినెస్ ఇప్పటికే ప్రారంభమైంది. భారీ ధరకు 2.0 హక్కులను సొంతం చేసుకునేందుకు డిస్ట్రిబ్యూటర్ లు ఎగబడుతున్నారు. తెలుగు రాష్ట్రాల్లో ఈచిత్ర పంపిణీ హక్కులను గ్లోబల్ సినిమాస్ దక్కించుకుంది. ఎంత మొత్తానికి పంపిణీ హక్కులను సొంతం చేసుకుంది అనే విషయాన్ని ఆ సంస్థ ప్రకటించకపోయినా రజిని చిత్రాల్లో రికార్డ్ మొత్తానికి అమ్ముడైనట్లు సమాచారం.