‘బాహుబలి’, ‘రుద్రమదేవి’ లాంటి రెండు ప్రత్యేకత సంతరించుకున్న సినిమాలతో దూసుకుపోతోన్న తెలుగు సినిమాకు మరో ప్రత్యేకత చేకూర్చేందుకు వస్తోన్న సినిమాయే ‘కంచె’. రెండో ప్రపంచ యుద్ధ నేపథ్యంలో ఇండియన్ సినిమాలో వస్తోన్న మొట్టమొదటి సినిమా కావడంతో ఈ సినిమా ప్రస్తుతం టాలీవుడ్లో టాక్ ఆఫ్ ది టౌన్గా మారిపోయింది. విలక్షణ దర్శకుడు క్రిష్ రూపొందించిన ఈ సినిమా తెలుగు సినీ ప్రేక్షకుడికి ఓ సరికొత్త అనుభూతినిస్తుందని సినిమా యూనిట్ చెబుతూ వస్తోంది.
దసరా కానుకగా అక్టోబర్ 22న విడుదల కానున్న ఈ సినిమాపై అంతటా భారీ అంచనాలే ఉండడంతో సినిమాను పెద్ద ఎత్తున రిలీజ్ చేస్తున్నారు. ఇక కంచె టీమ్ కూడా సినిమా విషయంలో చాలా కాన్ఫిడెంట్గా ఉంది. హీరో వరుణ్ తేజ్ ఈ సినిమా ద్వారా నటుడిగా ఒక ప్రత్యేక గుర్తింపు తెచ్చుకుంటానన్న నమ్మకాన్ని వ్యక్తం చేస్తున్నారు. ఇక సినిమా విడుదలకు ఇంకా రెండు రోజులే ఉన్న నేపథ్యంలో కంచె టీమ్ ప్రచార కార్యక్రమాలను వేగవంతం చేసేసింది. ఈ క్రమంలోనే ఈ సాయంత్రం కంచె సినిమా సెకండ్ ట్రైలర్ను విడుదల చేశారు.
ఇక ఇప్పటికే ఫస్ట్ ట్రైలర్తో విపరీతమైన ఆసక్తి రేకెత్తించిన ఈ సినిమా, రెండో ట్రైలర్తో మరింతగా కట్టిపడేస్తోంది. ప్రపంచాన్ని వణికించిన ఒక యుద్ధ నేపథ్యానికి ఒక ప్రేమకథను జతచేస్తూ క్రిష్ చేసిన ఈ ప్రయోగం తెరపై ఎంత అందంగా ఉండబోతోందో ఈ ట్రైలర్తో మరోసారి స్పష్టమైంది. యుద్ధ నేపథ్యం, ప్రేమకథలోని ఫీల్, ఒక గ్రామీణ వాతావరణ నేపథ్యం.. ఇలా దేనికదే ఓ ప్రత్యేక మూడ్ను నింపుకొని ఉన్న ఈ సినిమాలో క్రిష్ మార్క్ ఎమోషనల్ సన్నివేశాలు ఏ రేంజ్లో ఉండనున్నాయన్నది ట్రైలర్ సుస్పష్టం చేస్తోంది. ఇక ఇన్ని అంచనాలతో, ప్రత్యేకతలతో వస్తోన్న సినిమా ప్రేక్షకులను ఏ స్థాయిలో ఆకట్టుకుంటుందనేది రెండు రోజుల్లో తేలిపోనుంది.
ట్రైలర్ కోసం ఇక్కడ క్లిక్ చేయండి
