ముఖ్య అంశాలు
- తెలుగు, హిందీ, తమిళం సహా 7 భాషల్లో సినిమాలు, వెబ్ సిరీస్లు, లైవ్ స్పోర్ట్స్, ఏఐ కంటెంట్ను ప్రకటించిన జీ5.
- తెలుగు లైనప్లో నందమూరి బాలకృష్ణ ‘ఎన్బీకే111’, వెంకటేష్-అనీల్ రావిపూడి కాంబినేషన్ మూవీ, ‘వృషకర్మ’ చిత్రాలతో పాటు ‘శ్రీమతి’, ‘అబ్జెక్షన్ మై లార్డ్’ వంటి సిరీస్లు.
- కంటెంట్ నిర్మాణానికి సంబంధించి అన్నపూర్ణ స్టూడియోస్, శ్రీ వెంకటేశ్వర క్రియేషన్స్, సితార ఎంటర్టైన్మెంట్స్ తదితర ప్రముఖ సంస్థలతో ఒప్పందాలు.
డిజిటల్ స్ట్రీమింగ్ ప్లాట్ఫామ్ ‘జీ5’ (ZEE5) వినోద రంగంలో సరికొత్త లైనప్తో ప్రేక్షకుల ముందుకు రానుంది. వివిధ వర్గాల వీక్షకులను అలరించేందుకు ఏకంగా ఏడు భాషల్లో భారీ కంటెంట్ లైనప్ను అధికారికంగా ప్రకటించింది. వైవిధ్యమైన కథలు, కొత్త దర్శకులు, సరికొత్త ఫార్మాట్లతో కంటెంట్ను అందుబాటులోకి తీసుకువస్తున్నట్లు వెల్లడించింది.
తెలుగు, హిందీ, తమిళం, మరాఠీ, మలయాళం, కన్నడ, బెంగాలీ భాషల్లో సినిమాలు, వెబ్ సిరీస్లు, లైవ్ స్పోర్ట్స్, ఏఐ (AI) ఆధారిత కథనాలు, యానిమేషన్ కంటెంట్ అందించనున్నట్లు సంస్థ తెలిపింది.
తెలుగులో క్రేజీ ప్రాజెక్ట్లు
తెలుగు ప్రేక్షకుల కోసం జీ5 ప్రత్యేక ప్రాజెక్ట్లను సిద్ధం చేసింది. నందమూరి బాలకృష్ణ నటిస్తున్న ‘ఎన్బీకే111’ (NBK111), వెంకటేష్ – అనీల్ రావిపూడి కాంబినేషన్ చిత్రం, ‘వృషకర్మ’ వంటి భారీ సినిమాలు ఈ లైనప్లో ఉన్నాయి. అలాగే నివేథా థామస్ నటిస్తున్న ‘శ్రీమతి’, శ్రీకాంత్ ప్రధాన పాత్రలో వస్తున్న ‘అబ్జెక్షన్ మై లార్డ్’ వంటి ఒరిజినల్ సిరీస్లతో పాటు ‘జయమ్ము నిశ్చయమ్మురా’ టాక్ షో కూడా మళ్లీ రాబోతోంది.
ఈ లైనప్ కోసం తెలుగులో అన్నపూర్ణ స్టూడియోస్, శ్రీ వెంకటేశ్వర క్రియేషన్స్, సితార ఎంటర్టైన్మెంట్స్, శ్రీ వెంకటేశ్వర సినీ చిత్ర, వృద్ధి సినిమాస్ వంటి ప్రముఖ నిర్మాణ సంస్థలతో జీ5 భాగస్వామ్యం కుదుర్చుకుంది.
హిందీ, ఇతర భాషల్లోనూ వినోదాలు
హిందీలో వినోద్ కాంబ్లీ జీవితం ఆధారంగా తెరకెక్కుతున్న ‘కాంబ్లీ’, ‘ది స్కామ్ లీక్డ్’, ఆర్.మాధవన్ హోస్ట్గా ‘జీనా ఐసీ కా నామ్ హై 2.0’, మోహిత్ రైనా ‘రంగ్బాజ్ 4’తో పాటు వరుణ్ ధావన్ ‘హై జవానీ తో ఇష్క్ హోనా హై’, బాబీ డియోల్ ‘బండార్’, కంగనా రనౌత్ ‘భారత్ భాగ్య విధాత’ వంటి చిత్రాలు డిజిటల్ స్ట్రీమింగ్కు సిద్ధమవుతున్నాయి.
మరోవైపు తమిళం, మలయాళం, కన్నడ, మరాఠీ, బెంగాలీ భాషల్లోనూ ప్రాంతీయ కథలు, హిట్ షోల తదుపరి సీక్వెళ్లను జీ5 ప్రకటించింది.
లైవ్ స్పోర్ట్స్, ఏఐ కంటెంట్
కేవలం సినిమాలు, సిరీస్లకే పరిమితం కాకుండా ఫిఫా, బండేస్లిగా, ఐఎల్టీ సీజన్ 5, తమిళనాడు కబడ్డీ వంటి లైవ్ స్పోర్ట్స్ను కూడా జీ5 అందుబాటులోకి తెస్తోంది. విక్రమ్ భేతాళ్, తిరుపతి బాలాజీ, రామ ఆంజనేయ యుద్ధం వంటి ఏఐ మరియు యానిమేషన్ ప్రాజెక్ట్లను కూడా అందించనుంది.
భారతీయ ప్రేక్షకుల అభిరుచులకు అనుగుణంగా స్మార్ట్ టెక్నాలజీ, మెరుగైన కంటెంట్తో ముందుకు సాగుతున్నామని, దేశంలోనే అత్యంత ఆదరణ పొందిన స్వదేశీ ఎంటర్టైన్మెంట్ వేదికగా నిలవడమే తమ లక్ష్యమని జీ5 ఇండియా బిజినెస్ హెడ్ తేజ్కరన్ సింగ్ బజాజ్ వెల్లడించారు.
