మెగాస్టార్ చిరంజీవితో స్టాలిన్, సూపర్ స్టార్ మహేష్ బాబు తో స్పైడర్ వంటి సినిమాలు తీసి మంచి పేరు గడించిన తమిళ డైరెక్టర్ ఏ ఆర్ మురుగదాస్ సమర్పణలో ప్రస్తుతం తెరకెక్కుతోన్న మూవీ ఆగష్టు 16, 1947. గౌతమ్ కార్తిక్ హీరోగా ఎన్.ఎస్ పొన్కుమార్ దర్శకత్వంలో రూపొందిన ఈ పిరియాడికల్ మూవీని ఏఆర్.మురుగదాస్ ప్రొడక్షన్ బ్యానర్ పై ఏఆర్ మురుగదాస్, ఓం ప్రకాష్ భట్, నర్సిరామ్ చౌదరి భారీ బడ్జెట్ తో అత్యున్నత నిర్మాణ విలువలతో నిర్మించారు. ఇక ఈ సినిమాకి ఆదిత్య జోషి సహ నిర్మాత. ప్రముఖ నిర్మాత ఎన్వీ ప్రసాద్ ఈ సినిమాని తెలుగులో విడుదల చేస్తున్నారు.
ఏప్రిల్ 14న ఈ సినిమా విడుదల కాబోతున్న నేపధ్యంలో సినిమా యూనిట్ నేడు ప్రెస్ మీట్ నిర్వహించింది. ప్రెస్ మీట్ లో మురుగదాస్ మాట్లాడుతూ ఈ కథ చదువుతున్నపుడు చాలా అద్భుతంగా అనిపించింది. తప్పకుండా దీనిని నిర్మించాలని నిర్ణయించుకున్నాను. ఇది చాలా స్పెషల్ మూవీ అలానే పిరియాడికల్ జానర్ లో సాగే ఫిల్మ్. ఆగస్టు 15 దేశ చరిత్రలో చాలా ముఖ్యమైన రోజు. ఆగస్టు 14, 15, 16 ఈ మూడు రోజుల్లో ఓ మారుమూల పల్లెలో జరిగే కథ ఇది. చుట్టూ అడవి కొండ మధ్య వున్న ఊరు. అక్కడికి ఒక వార్త చేరవేయడం కష్టం. ఆగస్ట్ 15న ఫ్రీడమ్ వచ్చిందని మనందరికీ తెలుసు.
కానీ ఆ ఊరు ఇంకా స్వతంత్రం కోసం పోరాడుతూనే వుంటుంది. ఓ బ్రిటిష్ అధికారి ఈ వార్తని ఓ కారణం చేత వారికి తెలియకుండా దాచిపెడతాడు. వ్యక్తిగతంగా వారికి ఆగస్ట్ 16న స్వతంత్రం పొందుతారు. ఆగస్ట్ 16న ఏం జరిగిందనేది చాలా ఉత్కంఠ భరితంగా వుంటుంది. యాక్షన్, ఎమోషన్స్, లవ్, హ్యుమర్ ఇవన్నీ కలసి ఒక అందమైన కథ వుంటుంది. ఇది రెగ్యులర్ ఫిల్మ్ కాదు. మీ అందరికీ తప్పకుండా నచ్చుతుంది. ఇది మీ అందరికీ నచ్చుతుందని నమ్ముతున్నాను అన్నారు. హీరో గౌతమ్ కార్తిక్ మాట్లాడుతూ ఇది నా మనసుకు చాలా దగ్గరైన సినిమా. చాలా హార్డ్ వర్క్ చేశాం.
ఇంత మంచి ప్రాజెక్ట్ లో భాగం చేసిన మురుగదాస్ గారికి కృతజ్ఞతలు. ఎప్పటికీ గుర్తుండిపోయే కథ ఇది. దర్శకుడు చాలా గొప్పగా తీశారు. తెలుగు ప్రేక్షకులందరికీ సినిమా నచ్చుతుందనే నమ్మకం వుంది. చాలా మంచి సినిమా, మాకు మీ అందరి ఆదరణ కావాలి అని అన్నారు. దర్శకుడు ఎన్.ఎస్ పొన్కుమార్ మాట్లాడుతూ గతవారం విడుదలైన ట్రైలర్ కి చాలా అద్భుతమైన రెస్పాన్స్ వచ్చింది. ఏప్రిల్ 14న సినిమాని థియేటర్ లో చూసి ఆదరించాలి అని కోరారు. నిర్మాత మధు మాట్లాడుతూ ఈ సినిమా చాలా యూనిక్ గా అనిపించింది. క్లైమాక్స్ అంతా గూస్ బంప్స్ వచ్చాయి. ఏప్రిల్ 14న సినిమాని విడుదల చేస్తున్నాం. తప్పకుండా అందరికీ నచ్చుతుందనే నమ్మకం వుంది అని అన్నారు.
