మదర్ సెంటిమెంట్, హారర్ మరియు యాక్షన్ అంశాల కలయికతో రూపొందిన చిత్రం ‘ఎర్రచీర – ది బిగినింగ్’. బేబి డమరి సమర్పణలో, శ్రీ సుమన్ వెంకటాద్రి ప్రొడక్షన్స్ నిర్మించిన ఈ సినిమా ఫిబ్రవరి 6న గ్రాండ్గా విడుదల కానుంది. ఈ సందర్భంగా దర్శకుడు, నటుడు సుమన్ బాబు మీడియాతో మాట్లాడుతూ చిత్ర విశేషాలను పంచుకున్నారు.
చింతల్ ప్రాంతంలో జరిగిన ఒక యదార్థ సంఘటన ఆధారంగా ఈ కథను సిద్ధం చేసినట్లు సుమన్ బాబు తెలిపారు. క్వాలిటీ విషయంలో రాజీ పడకుండా, ‘హనుమాన్’ తరహా గ్రాఫిక్స్ కోసం మూడు చోట్ల సీజీ వర్క్ చేయించడం వల్లే సినిమా విడుదల కొంత ఆలస్యమైందని ఆయన వివరించారు. ఈ చిత్రంలో శ్రీరామ్, కమల్ కామరాజు, కారుణ్య చౌదరి సహా 23 మంది ప్రముఖ నటులు కీలక పాత్రలు పోషించారు.
ముఖ్యంగా బాలీవుడ్ స్టార్ అక్షయ్ కుమార్ నటిస్తున్న ‘భూత్ బంగ్లా’ చిత్రంలోని ఒక షాట్ తమ ‘ఎర్రచీర’ ట్రైలర్ నుంచే కాపీ కొట్టారని సుమన్ బాబు సంచలన వ్యాఖ్యలు చేశారు. ప్రమోషన్లలో భాగంగా బీ, సీ సెంటర్లలోని ప్రేక్షకులకు ప్రతి షోలో లక్కీ డ్రా ద్వారా 10 చీరలను బహుమతిగా ఇవ్వనున్నట్లు ప్రకటించారు. త్వరలోనే ఈ చిత్రానికి సీక్వెల్గా ‘అంబిక’ను తెరకెక్కించనున్నట్లు ఆయన వెల్లడించారు.