‘శ్రీమంతుడు’.. గత వారం రోజులుగా బాక్సాఫీస్ వద్ద కాసుల వర్షం కురిపిస్తోన్న తెలుగు సినిమా. సూపర్ స్టార్ మహేష్ హీరోగా దర్శకుడు కొరటాల శివ తెరకెక్కించిన ఈ సినిమా, మొదటి షో నుంచే సూపర్ హిట్ టాక్తో దూసుకుపోతోంది. నేటితో విజయవంతంగా రెండో వారంలోకి అడుగుపెట్టిన శ్రీమంతుడు, రెండో వారంలోనూ అదే జోరు కొనసాగిస్తోంది. ఓ సోషల్ మెసేజ్ ఉన్న అంశాన్ని అన్ని కమర్షియల్ అంశాలతో జోడించి తీసిన ఈ సినిమాకు అన్ని వర్గాల నుంచీ సూపర్ రెస్పాన్స్ వచ్చింది. పలువురు రాజకీయ ప్రముఖులు సైతం ఈ సినిమాను కొనియాడారు.
మహేష్ లాంటి సూపర్ స్టార్ నటించిన సినిమా కావడం, అంతటా సూపర్ హిట్ టాక్ రావడంతో మొదటి వారం ‘శ్రీమంతుడు’ సినిమా కలెక్షన్ల వర్షం కురిపించింది. ఇక ‘శ్రీమంతుడు’ సినిమా నిర్మాణ సంస్థ అయిన మైత్రీ మూవీ మేకర్స్, ఈ ఉదయం మొదటి వారం కలెక్షన్లకు సంబంధించిన వివరాల విడుదల చేశారు. మొదటివారం ముగిసేసరికి ఈ సినిమా ప్రపంచవ్యాప్తంగా అన్ని ఏరియాలను కలుపుకొని 66.50కోట్ల రూపాయల షేర్ సాధించిందని నిర్మాణ సంస్థ తెలిపింది.
మహేష్ అనితరసాధ్యమైన నటన, కొరటాల శివ టేకింగ్, బలమైన పాయింట్, మహేష్-శృతి హాసన్ల కాలేజీ ఎపిసోడ్, ఫ్యామిలీ సెంటిమెంట్ లాంటి అంశాలు శ్రీమంతుడు సినిమాకు బాగా కలిసివచ్చాయి. ఇక ఫ్యామిలీ ప్రేక్షకులు కూడా సినిమాను బాగా ఆదరిస్తున్న నేపథ్యంలో రెండోవారం కూడా ‘శ్రీమంతుడు’ మంచి కలెక్షన్లు కొల్లగొడుతుందని ట్రేడ్ వర్గాల అంచనా అంచనా.
