గతఏడాది విడుదలైన కేరాఫ్ కంచరపాలెం చిత్రం విభిన్న చిత్రంగా పేరుతెచ్చుకుంది. జీవితంలో వివిధ దశలలో ఎదురైయ్యే ప్రేమకథలు, వాటి పర్యవసానాలు తెరపై దర్శకుడు సహజంగా తెరకెక్కించిన తీరుకి సినీ విమర్శకులు ఫిదా అయ్యారు. ఈ చిత్రం కమర్షియల్ గా పెద్దగా విజయం సాధించకపోయినప్పటికీ, దర్శకుడు మహా వెంకటేష్ కి, నిర్మాతలకు అలాగే నటులకు మంచి పేరు తెచ్చిపెట్టింది.
కాగా ఈ చిత్రం ప్రముఖ డిజిటల్ మీడియా మాధ్యమం అయిన నెట్ ఫ్లిక్స్ నందు అందుబాటులోకి రానుంది. ఈనెల ఆరు నుండి నెట్ ఫ్లిక్స్ చందాదారులకి కంచరపాలెం మూవీ చూసే అవకాశం కలదు. చిన్న చిత్రం కావడం వలన ఈ చిత్రం ప్రేక్షకులకు చేరకుండానే థియేటర్ల నుండి వెళ్ళిపోయింది. మరి థియేటర్లో మిస్సయ్యామే అని బాధపడేవారు ఈ చిత్రాన్ని నెట్ ఫ్లిక్స్ లో చూసి ఆనందించే అవకాశం దక్కింది.
