‘స్వాతి ముత్తిన మాలే హానియే’, ‘టోబీ’ వంటి విజయవంతమైన చిత్రాల తర్వాత, కన్నడ స్టార్ రాజ్ బి. శెట్టి మరోసారి ప్రేక్షకులను ఆకట్టుకోబోతున్నారు. గురుదత్ గనిగ దర్శకత్వంలో రూపొందుతున్న ‘కరవాలి’ చిత్రం కర్ణాటక తీరప్రాంత అందాలను తెరపై చూపించబోతోంది. ప్రజ్వల్ దేవరాజ్ హీరోగా నటిస్తుండగా, రాజ్ బి. శెట్టి ‘మవీర’ అనే పవర్ఫుల్ పాత్రలో కనిపించనున్నారు.
ఇప్పటికే విడుదలైన పోస్టర్, గ్లింప్స్ సినిమాపై భారీ ఆసక్తిని పెంచాయి. గేదెల మధ్యలో నిలబడి, చేతిలో కాగడ పట్టుకుని ఉన్న రాజ్ బి. శెట్టి లుక్ యాక్షన్ సీక్వెన్స్లను హింట్ ఇస్తోంది.
దర్శకుడు గురుదత్ గనిగ మాట్లాడుతూ, “ఈ పాత్రకు సరిపోయే నటుడిని ఎన్నుకోవడం చాలా కష్టం అయింది. చివరికి రాజ్ బి. శెట్టి కథ విని, ఫుటేజ్ చూసిన తర్వాత వెంటనే ఒప్పుకున్నారు. ఆయన ‘మవీర’ పాత్రకు ప్రాణం పోశారు” అన్నారు.
కర్ణాటక తీరప్రాంతంలో చిత్రీకరించిన ఈ సినిమా మనుగడ, విధేయత, మానవ స్వభావం వంటి అంశాలతో రూపొందింది. “జంతువు vs మానవుడు” అనే ట్యాగ్లైన్తో వస్తున్న ఈ చిత్రంలో ప్రజ్వల్, రాజ్తో పాటు మిత్రా, రమేష్ ఇందిరా, సంపద కీలక పాత్రల్లో నటిస్తున్నారు. సచిన్ బస్రూర్ సంగీతం, అభిమన్యు సదానందన్ సినిమాటోగ్రఫీ అందించిన ఈ చిత్రం త్వరలో విడుదల కానుంది.
