బాలీవుడ్ స్టార్ హీరో రణబీర్ కపూర్ తన 44వ పుట్టినరోజును ఘనంగా జరుపుకుంటున్నారు. ఈ ప్రత్యేక సందర్భంగా ఆయన పాపారాజీల సమక్షంలో కేక్ కట్ చేసి సంబరాల్లో పాల్గొన్నారు. అనంతరం ముంబై పాలి హిల్లోని తమ నివాసం వద్దకు భారీగా తరలివచ్చిన అభిమానులను ఉద్దేశించి రణబీర్ కపూర్, ఆలియా భట్ దంపతులు ప్రత్యేకంగా అభివాదం చేశారు.
సుమారు ₹250 కోట్ల విలువైన ఆరు అంతస్తుల ‘కృష్ణరాజ్’ బంగ్లా బాల్కనీ నుంచి వీరిద్దరూ అభిమానుల వైపు చేతులు ఊపుతూ కనిపించిన దృశ్యాలు ప్రస్తుతం సోషల్ మీడియాలో చక్కర్లు కొడుతున్నాయి. రణబీర్, ఆలియా జంట 2025 నవంబర్లో ఈ నూతన గృహంలోకి ప్రవేశించారు. తమ అభిమాన నటుడిని పుట్టినరోజు వేళ ప్రత్యక్షంగా చూసేందుకు వచ్చిన అభిమానులకు ఈ జంట చేతులు జోడించి ధన్యవాదాలు తెలిపింది.
వరుస భారీ ప్రాజెక్టులతో బిజీ
కెరీర్ పరంగా రణబీర్ కపూర్ ప్రస్తుతం అత్యంత భారీ చిత్రాలతో బిజీగా ఉన్నారు. నితీష్ తివారీ దర్శకత్వంలో తెరకెక్కుతున్న ప్రతిష్టాత్మక పౌరాణిక చిత్రం ‘రామాయణ: పార్ట్ 1’లో రణబీర్ రాముడి పాత్రను పోషిస్తున్నారు. ఈ చిత్రం ఈ ఏడాది దీపావళి కానుకగా నవంబర్ 6న థియేటర్లలో విడుదల కానుంది.
మరోవైపు, ప్రముఖ దర్శకుడు సంజయ్ లీలా భన్సాలీ రూపొందిస్తున్న ‘లవ్ & వార్’ చిత్రంలోనూ రణబీర్ నటిస్తున్నారు. ఇటీవల విడుదలైన ఈ సినిమా ఫస్ట్ లుక్ పోస్టర్ సినీ ప్రియులను ఆకట్టుకుంది. ఇందులో బ్లూ కలర్ కారులో రక్తంతో తడిసిన చేతితో రణబీర్ ఇంటెన్స్ లుక్లో కనిపించారు. రణబీర్ కపూర్, విక్కీ కౌశల్ ఆర్మీ ఆఫీసర్లుగా నటిస్తున్న ఈ చిత్రంలో ఆలియా భట్ కథానాయికగా నటిస్తున్నారు. 2007 నాటి ‘సావరియా’ తర్వాత భన్సాలీతో రణబీర్, అలాగే ‘గంగూబాయి కతియావాడి’ తర్వాత ఆలియా మళ్లీ కలిసి పనిచేస్తున్న ఈ క్రేజీ చిత్రం 2027 జనవరి 21న ప్రేక్షకుల ముందుకు రానుంది.
