అనుష్క శెట్టి ప్రధాన పాత్రలో తెరకెక్కుతున్న మరో ప్రతిష్టాత్మక చిత్రం నిశ్శబ్దం. దర్శకుడు హేమంత్ మధుకర్ తెరకెక్కిస్తున్నఈ హారర్ థ్రిల్లర్ లో అనుష్క మూగదైన ప్రొఫెషనల్ పెయింటర్ గా నటిస్తున్నారు. ప్రముఖ రచయిత కోన వెంకట్… కోన ఫిలిమ్స్ బ్యానర్ పై ఈ చిత్రాన్ని నిర్మిస్తుండగా గోపి సుందర్ సంగీతం అందిస్తున్నారు. కాగా ఈ మూవీలో మరో కీలక పాత్ర చేస్తున్న షాలిని పాండే లుక్ ని కొద్దిసేపటి క్రితం విడుదల చేశారు. షాలిని ఈ మూవీలో సోనాలి అనే పాత్రలో కనిపించనున్నారు. షాలిని కీలక మర్డర్ కేసులో సాక్షి లేదా, ఆత్మ గా నటించే అవకాశం కలదు.
అమెరికా లోని సియాటిల్ ప్రదేశంలో ఈ మూవీ కథ మొత్తం నడుస్తుంది. ఈ మూవీలో హీరోగా చేస్తున్న మాధవన్ మ్యుజీషియన్ గా నటిస్తుండగా, మరో హీరోయిన్ అంజలి సియాటిల్ పోలీస్ డిపార్ట్మెంట్ లో క్రైమ్ ఇన్వెస్టిగేటివ్ ఆఫీసర్ గా చేస్తున్నారు. అనుష్క పుట్టిన రోజున విడుదలైన ఈ చిత్ర టీజర్ ప్రేక్షకులను ఆకట్టుకుంది. అరుంధతి, భాగమతి వంటి హారర్ చిత్రాలలో మెప్పించి సూపర్ హిట్స్ అందుకున్న అనుష్క నిశ్శబ్దం చిత్రంలో ఎలా నటిస్తారో చూడాలి మరి.
