‘స్వామిరారా’ సినిమాతో ట్రెండ్ సృష్టించిన సుధీర్ వర్మ దర్శకత్వంలో తాజాగా తెరకెక్కిన చిత్రం ‘దోచేయ్’. నాగచైతన్య, కృతి సనన్ హీరో హీరోయిన్లుగా నటించిన ఈ సినిమాను బీవీఎస్ఎన్ ప్రసాద్ నిర్మించారు. ఇప్పటికే విడుదలైన ఫస్ట్లుక్ టీజర్, సాంగ్ టీజర్స్ సినిమాపై మంచి క్రేజ్ పెంచేశాయి. తాజాగా ఈ సినిమా ఆడియో ఆవిష్కరణ వేడుకను నిన్న (ఏప్రిల్ 10న) నిర్వహించారు. పలువురు సినీ ప్రముఖులు పాల్గొనగా ఆడియో వేడుకను ఘనంగా నిర్వహించారు.
ఈ సందర్భంగా హీరో నాగ చైతన్య మాట్లాడుతూ.. ‘స్వామిరారా’ సినిమాతో ట్రెండ్ సృష్టించిన దర్శకుడు సుధీర్ వర్మ ఈ సినిమాతోనూ మరోసారి ట్రెండ్ సృష్టిస్తాడని ఆశాభావం వ్యక్తం చేశారు. ఓ విభిన్న కథతో తెరకెక్కిన ఈ సినిమా తన కెరీర్కి మాత్రమే కాక తెలుగు సినీ పరిశ్రమకూ ఓ ప్రత్యేక సినిమాగా మిగిలిపోతుందని నాగచైతన్య అన్నారు. ఇదే వేడుకలో అక్కినేని నాగార్జున, ప్రముఖ దర్శకులు ఎస్.ఎస్.రాజమౌళి, సుకుమార్, ప్రముఖ సంగీత దర్శకులు ఎం.ఎం. కీరవాణి తదితరులు పాల్గొన్నారు. దోచేయ్ సినిమాకు ఎమ్.ఆర్.సన్నీ స్వరపరచిన పాటలకు మంచి స్పందన వస్తోంది.
