ఎప్పుడూ సరికొత్త కథలతో, విభిన్న గెటప్లతో మనల్ని మెప్పిస్తూ ఉండే తమిళ సూపర్ స్టార్ సూర్య, తాజాగా ‘మాస్’ పేరుతో మరో సరికొత్త సినిమాతో మన ముందుకు రానున్నాడు. ‘గ్యాంబ్లర్'(మంగాత్తా), ‘బిర్యాని’ సినిమాల ద్వారా దర్శకుడుగా తానేంటో నిరూపించుకున్న వెంకట్ ప్రభు ఈ సినిమాకు దర్శకత్వం వహించాడు. స్టూడియో గ్రీన్తో కలిసి సూర్య సొంతంగా ఈ సినిమాను నిర్మించడం విశేషం. ఇప్పటికే షూటింగ్ పూర్తి చేసుకున్న ఈ సినిమా ప్రస్తుతం పోస్ట్ ప్రొడక్షన్ కార్యక్రమాలు జరుపుకుంటోంది.
‘మాస్’ సినిమాకు ఉన్న క్రేజ్ను దృష్టిలో పెట్టుకొని ఒకేసారి తెలుగు, తమిళ భాషల్లో భారీ ఎత్తున విడుదల చేయనున్నారు. ఇక ఈ మధ్యే విడుదలైన ఈ సినిమా తమిళ వర్షన్కు సంబంధించిన అఫీషియల్ టీజర్తో ఈ సినిమాపై అంచనాలు తారాస్థాయికి చేరుకున్నాయి. సూపర్ న్యాచురల్ థ్రిల్లర్గా తెరకెక్కిన ఈ సినిమాలో సూర్య ఆత్మగా కనిపించి భయపెడతాడని సమాచారం. ఈ సినిమాకు తెలుగు, తమిళ భాషల్లో భారీగా ప్రచారాన్ని కల్పించేందుకు సినిమా యూనిట్ ఇప్పటికే రంగం సిద్ధం చేసుకుంది. ఇక ఎన్నో అంచనాల మధ్య తెరకెక్కిన ‘మాస్’, ప్రపంచవ్యాప్తంగా మే 15న ప్రేక్షకుల ముందుకు కానుంది.