తెలుగు, తమిళ భాషల్లో అద్భుతమైన సినిమాలతో మెప్పించిన నటి జ్యోతిక, తమిళ సూపర్ స్టార్ సూర్యను పెళ్ళాడిన తర్వాత సినిమాలకు దూరమయ్యారు. మళ్ళీ తొమ్మిదేళ్ళ తర్వాత తాజాగా ’36 వయధినిలె’ అనే సినిమాతో ఆమె మన ముందుకొచ్చిన విషయం తెలిసిందే. ఈ మధ్యే తమిళ నాట భారీ ఎత్తున విడుదల అయిన ఈ సినిమాకు మంచి టాక్ రావడంతో పాటు కలెక్షన్లు కూడా బాగా వస్తున్నాయి. జ్యోతిక భర్త సూర్య ఈ సినిమాను స్వయంగా నిర్మించడం విశేషం.
ఇక తమిళంలో మంచి విజయాన్ని సొంతం చేసుకున్న ఈ సినిమాను తెలుగులో డబ్ చేయాలన్న ఆలోచనలో సూర్య ఉన్నారన్న విషయం తెలిసిందే. తెలుగులో ‘చంద్రముఖి’తో పాటు ‘ఠాగూర్’, ‘మాస్’, ‘షాక్’ చిత్రాలతో మెప్పించిన జ్యోతికకు ఇక్కడ మంచి గుర్తింపు ఉంది. ఆ క్రేజ్ను దృష్టిలో పెట్టుకొని ఈ సినిమాను తెలుగులో విడుదల చేయనున్నారు. ఇప్పటికే తెలుగు వర్షన్కు సంబంధించిన కార్యక్రమాలు మొదలు కాగా, తాజాగా ‘రావమ్మా మహాలక్ష్మి’ అనే తెలుగు టైటిల్ను కన్ఫర్మ్ చేశారు. జూన్ నెలలో ’36 వయధినిలె’ తెలుగు వర్షన్ విడుదలయ్యే సూచనలు ఉన్నాయి.