ప్రేమికుల దినోత్సవం కానుకగా విడుదలైన ‘నిలవే’ చిత్రం బాక్సాఫీస్ వద్ద మంచి వసూళ్లతో విజయవంతంగా ప్రదర్శితమవుతోంది. సౌమిత్ పోలాడి, శ్రేయాసి సేన్ జంటగా నటించిన ఈ మ్యూజికల్ లవ్ డ్రామాకు ప్రేక్షకుల నుంచి అద్భుతమైన స్పందన లభిస్తోంది. ఈ సందర్భంగా చిత్ర బృందం మంగళవారం హైదరాబాద్లోని రామానాయుడు స్టూడియోలో సక్సెస్ మీట్ నిర్వహించింది.
ముఖ్య అతిథిగా హాజరైన ప్రముఖ దర్శకులు వి. సముద్ర మాట్లాడుతూ, వాలెంటైన్స్ డే రేసులో నిలిచిన చిత్రాల్లో ‘నిలవే’ విశేష ఆదరణను సొంతం చేసుకుందని ప్రశంసించారు. నటుడు జెమిని సురేష్ స్పందిస్తూ, ఈ సినిమా నేటి తరం ‘గీతాంజలి’లా ఆహ్లాదకరంగా ఉందన్నారు. హీరో సౌమిత్ మాట్లాడుతూ, మూడేళ్ల కష్టానికి దక్కిన ప్రతిఫలమిదని, తమ చిత్రాన్ని ప్రేక్షకులు గుండెలకు హత్తుకోవడం సంతోషంగా ఉందన్నారు.
దర్శకుడు సాయి కే వెన్నం, నిర్మాత రాజ్ అల్లాడ మాట్లాడుతూ.. కొత్త వారితో చేసిన ఈ ప్రయత్నాన్ని ఆదరించినందుకు ధన్యవాదాలు తెలిపారు. ఆస్కార్ విజేత చంద్రబోస్ వీడియో సందేశం ద్వారా చిత్ర బృందానికి శుభాకాంక్షలు తెలియజేశారు. POV ఆర్ట్స్ ప్రొడక్షన్స్ నిర్మించిన ఈ చిత్రంలో హర్ష చెముడు కీలక పాత్రలో నటించగా, కళ్యాణ్ నాయక్ సంగీతం అందించారు.