తమిళ సూపర్ స్టార్ సూర్య హీరోగా రూపొందుతోన్న ’24’ సినిమా గత కొద్దికాలంగా సగటు సినీ అభిమానిని విపరీతంగా ఆకర్షిస్తోంది. ’13 బీ’, ‘ఇష్క్’, ‘మనం’ లాంటి విలక్షణ సినిమాలతో మెప్పించిన దర్శకుడు విక్రమ్ కుమార్ దర్శకత్వంలో తెరకెక్కిన సినిమా కావడం, ఓ సైన్స్ ఫిక్షన్ కథాంశంతో రూపొందిన వినూత్న సినిమా కావడంతో ’24’ సినిమాకు తెలుగు, తమిళంలో అద్భుతమైన క్రేజ్ వచ్చింది. ఈ నేపథ్యంలోనే ఈ సినిమాకు ఇప్పటికే బిజినెస్ కూడా పెద్ద ఎత్తున జరిగింది.

ఇక ఈ మధ్యే షూటింగ్ పూర్తి చేసుకున్న ఈ సినిమాకు సంబంధించిన స్టిల్ కానీ, పోస్టర్ కానీ ఇప్పటివరకూ రిలీజ్ కాని పక్షంలో అభిమానులు ఈ సినిమా ఫస్ట్‌లుక్ కోసం ఎంతగానో ఎదురుచూస్తున్నారు. తాజాగా ఈ ఎదురుచూపులకు తెరదించుతూ సూర్య, నవంబర్ 24న ఫస్ట్‌లుక్‌తో మెప్పించేందుకు సిద్ధమవుతున్నారు. కథ రీత్యా 24 నెంబర్‌కు ఉన్న ప్రత్యేకతను కంటిన్యూ చేస్తూ ఫస్ట్‌లుక్‌ను 24వ తేదీన ప్లాన్ చేశారు. సూర్య తన ట్విట్టర్ ఎకౌంట్ ద్వారా ఈ విషయాన్ని స్పష్టం చేశారు. సూర్య సరసన సమంత హీరోయిన్‌గా నటించిన ఈ సినిమాను తెలుగులో ప్రముఖ హీరో నితిన్ విడుదల చేయనున్నారు. సంక్రాంతి సీజన్‌కు ఈ సినిమా విడుదల కానుంది.