’ధురంధర్’, ‘ఓం భీమ్ బుష్’ చిత్రాలతో గుర్తింపు పొందిన నటి ఆయేషా ఖాన్ ముంబైలోని దాదర్ ప్రాంతంలో నీట్ (NEET) అభ్యర్థులకు మద్దతుగా నిరసన తెలపడానికి వెళ్లగా, ముంబై పోలీసులు ఆమెను నిర్బంధంలోకి తీసుకున్నారు. పరీక్షల్లో జరిగిన అక్రమాలకు వ్యతిరేకంగా విద్యార్థులు, కార్యకర్తలు చేపట్టిన ఈ కార్యక్రమానికి ఆమె తన సోదరుడు, స్నేహితులతో కలిసి హాజరయ్యారు. అయితే తాము ఎలాంటి నినాదాలు చేయలేదని, నిరసన ప్రారంభించకముందే పోలీసులు తమను అడ్డుకుని వర్లీ పోలీస్ స్టేషన్కు తరలించారని ఆయేషా తెలిపింది.
పోలీస్ వాహనం మరియు పోలీస్ స్టేషన్ నుండి ఆయేషా రికార్డ్ చేసిన వీడియోలు ప్రస్తుతం సోషల్ మీడియాలో వైరల్ అవుతున్నాయి. చట్టాన్ని ఉల్లంఘించకపోయినా తమను ఎందుకు అదుపులోకి తీసుకున్నారో స్పష్టమైన కారణం చెప్పలేదని ఆమె ప్రశ్నించింది. అయితే పోలీస్ అధికారులు తమతో మర్యాదగానే ప్రవర్తించారని పేర్కొంది. అలాగే నిరసనలపై నిషేధాజ్ఞలు మరుసటి రోజు నుండి అమల్లోకి రావలసి ఉండగా, అంతకంటే ముందే తమను ఎలా నిర్బంధిస్తారని ఆమె నిలదీసింది. ఈ సంఘటనపై నెటిజన్ల నుండి భిన్నమైన స్పందనలు వస్తున్నాయి.
’బిగ్ బాస్ 17′ ద్వారా మంచి పాపులారిటీ పొందిన ఆయేషా ఖాన్, తెలుగులో ‘ముఖచిత్రం’, ‘ఓం భీమ్ బుష్’, ‘మనమే’ వంటి చిత్రాలలో నటించి ప్రేక్షకుల మెప్పు పొందింది. ఇటీవల హిందీలో వచ్చిన ‘ధురంధర్’ సూపర్ హిట్ సాధించడంతో బాలీవుడ్లో కూడా ఆమెకు వరుస అవకాశాలు వస్తున్నాయి. ఒకవైపు నటిగా తన కెరీర్ను విజయవంతంగా నిర్మించుకుంటూనే, సామాజిక అంశాలపై ఇలా స్పందించడం చర్చనీయాంశంగా మారింది.
