సతీష్ జై హీరోగా నటిస్తూ స్వీయ దర్శకత్వంలో తెరకెక్కించిన చిత్రం ‘గజ’. ఫర్నాజ్ శెట్టి కథానాయికగా నటించిన ఈ చిత్రాన్ని డా. మైత్రి శరణ్ నిర్మించారు. మైత్రి మూవీస్ సంస్థ ద్వారా తెలుగులో ప్రేక్షకుల ముందుకు వస్తున్న ఈ చిత్రానికి మణిశర్మ సంగీతం అందించారు. ఈ క్రమంలో గురువారం హైదరాబాద్లో ‘అల్లకల్లోలంగా’ అనే లిరికల్ సాంగ్ను ప్రముఖ దర్శకుడు సాయి రాజేష్ ముఖ్య అతిథిగా హాజరై విడుదల చేశారు.
ఈ సందర్భంగా సాయి రాజేష్ మాట్లాడుతూ.. సతీష్ జై ఎన్నో సవాళ్లను దాటుకుని ఈ సినిమాను పూర్తి చేశారని, ‘గజ’ టీజర్ ఇప్పటికే ఆకట్టుకుందని తెలిపారు. రామ్ మిర్యాల గానం, మణిశర్మ సంగీతం ఈ పాటకు ప్రధాన బలంగా నిలిచాయని పేర్కొంటూ చిత్ర బృందానికి శుభాకాంక్షలు తెలిపారు.
దర్శక-హీరో సతీష్ జై మాట్లాడుతూ.. మణిశర్మ అందించిన సంగీతం, నేపథ్య సంగీతం సినిమాకు వెన్నెముకలా నిలిచాయని చెప్పారు. కమర్షియల్ హంగులతో పాటు మంచి ఎమోషన్, ఆలోచింపజేసే సందేశం ఈ కథలో ఉంటాయని, క్లైమాక్స్ ప్రేక్షకులను కదిలిస్తుందని వివరించారు.
కంటెంట్ బాగుంటే ప్రేక్షకులు తప్పక ఆదరిస్తారని నిర్మాత మైత్రి శరణ్ ధీమా వ్యక్తం చేశారు. మిట్టపల్లి సురేందర్ సాహిత్యం అందించిన ఈ చిత్రంలో ఇతర కీలక పాత్రల్లో పలువురు నటీనటులు నటించారు. ప్రస్తుతం నిర్మాణాంతర పనులు పూర్తి చేసుకుంటున్న ఈ సినిమా విడుదల తేదీని త్వరలోనే ప్రకటించనున్నారు.