నితిన్ మరియు నిత్య మీనన్ గతంలో “ఇష్క్” చిత్రంతో ప్రేక్షకుల మనసుని దోచుకున్నారు. ఈ జంట మరోసారి ప్రేక్షకుల ముందుకి రానున్నారు. నూతన దర్శకుడు విజయ్ కుమార్ కొండ దర్శకత్వంలో రానున్న “గుండె జారి గల్లంతయ్యిందే” చిత్రంలో వీరు ఇద్దరు కనిపించనున్నారు. “హైట్స్ ఆఫ్ లవ్” అన్న శీర్షికతో ప్రేక్షకుల ముందుకి రానున్న ఈ చిత్రాన్ని శ్రేష్ఠ మూవీస్ బ్యానర్ మీద సుధాకర్ రెడ్డి నిర్మిస్తున్నారు. అనూప్ రూబెన్స్ సంగీతం అందిస్తుండగా ఐ. ఆండ్రూ సినిమాటోగ్రఫీ అందిస్తున్నారు. తాజాగా ఈ చిత్రంలో మరో ఆకర్షణ జత చేరింది. పేరొందిన బాడ్మింటన్ క్రీడాకారిణి జ్వాల గుత్తా ఈ చిత్రంలో ఒక ప్రత్యేక పాటలో కనిపించనున్నారు.ప్రస్తుతం ఆ పాత చిత్రీకరణ జరుపుకుంటుంది అని నితిన్ తెలిపారు. ఇప్పటికే దాదాపుగా చిత్రీకరణ పూర్తి చేసుకున్న ఈ చిత్రం త్వరలో ప్రేక్షకుల ముందుకి రానుంది.