హీరో సూర్య నటిస్తున్న తాజా చిత్రం సురారై పోట్రు, తెలుగులో ఆకాశం నీ హద్దురా అనే టైటిల్ తో తెరకెక్కుతుంది. దర్శకురాలు సుధా కొంగర ఈ చిత్రానికి దర్శకత్వం వహిస్తున్నారు. డెక్కన్ ఎయిర్ వేస్ ఫౌండర్ జి ఆర్ గోపినాధ్ జీవిత కథ ఆధారంగా తెరకెక్కుతున్న ఈ చిత్రంపై భారీ అంచనాలున్నాయి. ఇటీవల విడుదలైన టీజర్ కి సూపర్ రెస్పాన్స్ దక్కింది.
కాగా ఈ చిత్రంలో కలెక్షన్ కింగ్ మోహన్ బాబు ఓ కీలక రోల్ చేస్తున్న సంగతి తెలిసిందే. సూర్య ఎలాగైనా ఎయిర్ వేస్ స్థాపించాలని వేసే అడుగులలో మార్గ దర్శకుడిగా మోహన్ బాబు పాత్ర ఉంటుందని సమాచారం. కాగా ఈ చిత్రంలోని మోహన్ బాబు లుక్ విడుదల చేశారు. ఎయిర్ వేస్ లో పనిచేసే ఎంప్లొయ్ గా మోహన్ బాబు కనిపిస్తుండగా, ఈ చిత్రంలో ఆయన భక్తవత్సల నాయుడు అనే పేరు పెట్టుకున్నారు. భక్తవత్సల నాయుడు మోహన్ బాబు ఒరిజినల్ నేమ్. మోహన్ బాబు ఆయన స్క్రీన్ నేమ్. చాలా కాలం తరువాత తన రియల్ నేమ్ ని మోహన్ బాబు సినిమాలో పాత్రకు వాడారు.