మలయాళ హీరో నివీన్ పౌలీ నటించిన లేటెస్ట్ క్రైమ్ థ్రిల్లర్ ‘బేబీ గర్ల్'(Baby Girl) ఇటీవల ఓటీటీలో స్ట్రీమింగ్కు వచ్చింది. ‘సర్వం మాయ’ వంటి విజయవంతమైన వెబ్ సిరీస్ తర్వాత వచ్చిన ఈ చిత్రం, థియేటర్లలో ఆశించిన స్థాయిలో విజయం సాధించలేకపోయింది. విమర్శకుల నుండి మిశ్రమ స్పందన రావడంతో బాక్సాఫీస్ వద్ద ఈ సినిమా వెనుకబడింది. అయితే, డిజిటల్ ప్లాట్ఫామ్లో మాత్రం ఈ చిత్రం కొత్త ఉత్సాహంతో దూసుకుపోతోంది.
ప్రస్తుతం ఈ సినిమా ప్రముఖ ఓటీటీ ప్లాట్ఫామ్ సోనీ లివ్ లో స్ట్రీమింగ్ అవుతోంది. అయితే, తొలుత కేవలం మలయాళం, హిందీ భాషల్లో మాత్రమే అందుబాటులో ఉన్న ఈ చిత్రం ఇప్పుడు తెలుగు, తమిళం మరియు కన్నడ భాషల్లో కూడా అందుబాటులోకి వచ్చింది. ఇప్పుడు మరికొన్ని భాషల్లో ఈ మూవీ స్ట్రీమింగ్ అవుతుండటంతో ఈ చిత్రాన్ని ఎక్కువ మంది ప్రేక్షకులు వీక్షించే అవకాశం ఉంది.
ఇక ఈ చిత్ర కథ విషయానికి వస్తే, ఒక ఆసుపత్రిలో అటెండెంట్గా పనిచేసే కథానాయకుడి చుట్టూ కథ తిరుగుతుంది. ఆ ఆసుపత్రి నుండి ఒక పసిబిడ్డ అపహరణకు గురవుతుంది. ఆ పసిపాపను వెతికే క్రమంలో జరిగే ఉత్కంఠభరితమైన సంఘటనలే ఈ సినిమా. కేవలం ఒకే రోజులో జరిగే ఈ కథను దర్శకుడు అరుణ్ వర్మ ఆసక్తికరంగా తెరకెక్కించారు. ఈ సినిమాలో లిజోమోల్ జోస్ మరియు సంగీత్ ప్రతాప్ కీలక పాత్రల్లో నటించారు.