పాన్-ఇండియా స్టార్ ప్రభాస్ నటించిన లేటెస్ట్ చిత్రం ‘ది రాజా సాబ్’ (The Raja Saab )సంక్రాంతి కానుకగా థియేటర్లలోకి వచ్చి, ప్రస్తుతం జియో హాట్‌స్టార్ ఓటీటీ వేదికగా స్ట్రీమింగ్ అవుతోంది. తెలుగు, తమిళం, కన్నడ మరియు మలయాళ భాషల్లో అందుబాటులో ఉన్న ఈ చిత్రంపై విడుదలైన మొదటి రోజు నుంచే క్రిటిక్స్ మరియు ఆడియన్స్ నుండి నెగిటివ్ రెస్పాన్స్ వచ్చింది. ఓటీటీలోకి వచ్చిన తర్వాత కూడా ఈ నెగిటివ్ టాక్ కొనసాగుతుండటం గమనార్హం.

అయితే, ఒకవైపు విమర్శలు వెల్లువెత్తుతున్నా, డిజిటల్ ప్లాట్‌ఫామ్‌పై మాత్రం ఈ సినిమా సంచలనం సృష్టిస్తోంది. ప్రస్తుతం జియో హాట్‌స్టార్‌లోని తెలుగు, తమిళ మరియు కన్నడ విభాగాల్లో ‘రాజా సాబ్’ నెంబర్ 1 స్థానంలో ట్రెండ్ అవుతోంది. మలయాళంలో కూడా నెంబర్ 2 స్థానాన్ని కైవసం చేసుకుంది. దీన్ని బట్టి నెగిటివ్ టాక్ ఉన్నప్పటికీ, ప్రభాస్ మేనియా కారణంగా ఓటీటీలో ఈ చిత్రాన్ని చూసేందుకు ప్రేక్షకులు విపరీతమైన ఆసక్తి చూపిస్తున్నారని స్పష్టమవుతోంది.

మారుతి దర్శకత్వంలో హారర్ ఫాంటసీ నేపథ్యంలో తెరకెక్కిన ఈ చిత్రంలో మాళవిక మోహనన్, నిధి అగర్వాల్ మరియు రిద్ధి కుమార్ హీరోయిన్లుగా నటించారు. పీపుల్ మీడియా ఫ్యాక్టరీ అత్యంత భారీ బడ్జెట్‌తో నిర్మించిన ఈ సినిమాకు థమన్ సంగీతం అందించారు.