మనోజ్ కుమార్ దర్శకత్వంలో తెరకెక్కిన ‘ప్రేమనే ఊరిలో’ చిత్రం నుంచి కొత్త పాటను శనివారం విడుదల చేశారు. మహారత్న ప్రొడక్షన్స్, ఎస్కే పిక్చర్స్, వనిల్లా ఎంటర్టైన్మెంట్స్ బ్యానర్లపై చందు శ్రీనివాస్, సురేష్ కొండేటి, మమత దేవేంద్ర ఎం సంయుక్తంగా ఈ చిత్రాన్ని నిర్మించారు. శ్రీరామ్, రమిక శివు, తపస్విని పూనాచ ప్రధాన పాత్రల్లో నటించిన ఈ సినిమాను సెప్టెంబర్ 25న విడుదల చేయనున్నారు.
పాట విడుదల కార్యక్రమంలో నటి కామాక్షి భాస్కర్ల పాల్గొని మాట్లాడారు. చిత్రబృందానికి శుభాకాంక్షలు తెలుపుతూ, చిత్ర నిర్మాతలకు ఈ సినిమాతో మంచి ఫలితం దక్కాలని ఆకాంక్షించారు. ఈ చిత్రంతో చందు శ్రీనివాస్ నిర్మాతగా పరిచయమవుతున్నారు. కథ నచ్చడంతో సినిమాను నిర్మించేందుకు ముందుకొచ్చానని, ప్రేక్షకులు ఆదరిస్తారని ఆశిస్తున్నానని ఆయన పేర్కొన్నారు.
గతంలో తాను విడుదల చేసిన ‘ప్రేమిస్తే’, ‘జర్నీ’, ‘షాపింగ్ మాల్’ చిత్రాల తరహాలోనే ‘ప్రేమనే ఊరిలో’ కూడా ఆకట్టుకుంటుందని నిర్మాత సురేష్ కొండేటి ధీమా వ్యక్తం చేశారు. తెలుగుతో పాటు కన్నడలోనూ ఈ చిత్రం విజయం సాధిస్తుందని ఆయన చెప్పారు.
ఇదొక భావోద్వేగపూరితమైన సంగీత ప్రేమకథ అని కథానాయకుడు శ్రీరామ్ తెలిపారు. తెలుగు ప్రేక్షకులకు ఈ కథ కచ్చితంగా నచ్చుతుందనే నమ్మకం ఉందని నటీమణులు రమిక శివు, తపస్విని పూనాచ అన్నారు. ఈ చిత్రానికి రాంబాబు సాహిత్యం అందించగా, సాకేత్ పాటలు ఆలపించారు.