తెలుగు చిత్ర పరిశ్రమలో నిర్మాతలు మరియు ఎగ్జిబిటర్ల మధ్య రెవెన్యూ షేరింగ్ వివాదం తీవ్ర రూపం దాల్చుతోంది. పర్సంటేజ్ షేరింగ్ విధానమే సరైనదని ఎగ్జిబిటర్లు వాదిస్తుండగా, ప్రభుత్వం అనుమతించినా పెంచిన ధరలకు సినిమాలను ప్రదర్శించబోమని SVC శిరీష్ రెడ్డి స్పష్టం చేశారు. దీనిపై స్పందించిన మైత్రీ రవి శంకర్, గతంలో ‘వార్ 2’, ‘కూలీ’, ‘అఖండ 2’ వంటి పెద్ద సినిమాలు విడుదల చేసినప్పుడు ఎగ్జిబిటర్ల సమస్యలు గుర్తుకు రాలేదా అని ప్రశ్నించారు. ప్రస్తుతం పెద్ద సినిమాలు చేతిలో లేనందుకే ఈ డిమాండ్లను ముందుకు తెస్తున్నారని ఆయన విమర్శించారు.

మరోవైపు, స్టార్ ప్రొడ్యూసర్ నాగవంశీ ఈ వివాదంపై స్పందిస్తూ, పరిశ్రమ ప్రస్తుతం రెవెన్యూ లేక ఇబ్బందుల్లో ఉందని పేర్కొన్నారు. సంక్రాంతి తర్వాత ప్రేక్షకులు థియేటర్లకు ఆశించిన స్థాయిలో రావడం లేదని, ఐపిఎల్ మరియు సరైన కంటెంట్ లేకపోవడం వల్ల ఈ వేసవి సీజన్ అంతగా కలిసి రాలేదని ఆయన ఆవేదన వ్యక్తం చేశారు. డిస్ట్రిబ్యూటర్లు, ఎగ్జిబిటర్లు కూర్చుని మాట్లాడుకుంటే ఈ సమస్యను సులభంగా పరిష్కరించుకోవచ్చని, అనవసరపు గందరగోళం సృష్టించాల్సిన అవసరం లేదని ఆయన అభిప్రాయపడ్డారు.

ప్రస్తుతం అందరి దృష్టి ‘పెద్ది’ సినిమాపైనే ఉందని, ఈ చిత్రం బ్లాక్ బస్టర్ కావాలని పరిశ్రమ మొత్తం కోరుకోవాల్సిన సమయం ఇది అని నాగవంశీ అన్నారు. భారీ అంచనాలున్న ఈ సినిమా విజయవంతమైతేనే ప్రేక్షకులు మళ్లీ థియేటర్లకు వస్తారని, రాబోయే ఆరు నెలల కాలం పరిశ్రమకు కీలకం కానుందని ఆయన తెలిపారు. ఇలాంటి కీలక సమయంలో కొత్త నిబంధనలు విధిస్తూ టెన్షన్ సృష్టించడం సరికాదని, చర్చల ద్వారా సమస్యలను సామరస్యంగా పరిష్కరించుకోవాలని నిర్మాతల మండలి కోరుతోంది.