తెలుగు, తమిళ, హిందీ భాషల్లో హీరోగా మంచి స్టార్‌డమ్ సంపాదించుకున్న సిద్ధార్థ్, తాజాగా ‘జిల్ జంగ్ జక్’ అనే సినిమాతో సిద్ధమవుతోన్న విషయం తెలిసిందే. గత కొద్దికాలంగా తన ఇమేజ్‌కు భిన్నంగా కొత్తదనం ఉన్న ప్రయోగాలనే చేసుకుంటూ వెళుతోన్న సిద్ధార్థ్, అదే కోవలో ఓ ప్రయోగాత్మక కథతో ‘జిల్ జంగ్ జక్’ అనే సినిమా చేశారు. అన్ని కార్యక్రమాలనూ పూర్తి చేసుకున్న ఈ సినిమా ఈ శుక్రవారం (ఫిబ్రవరి 12న) తమిళనాట పెద్ద ఎత్తున విడుదల కానుంది.
దర్శక ధీరుడు రాజమౌళి చేతుల మీదుగా విడుదలైన ట్రైలర్ ఇప్పటికే సోషల్ మీడియాలో మంచి ఆసక్తి రేకెత్తించింది. దీరజ్ వైడి దర్శకత్వంలో తెరకెక్కిన ఈ డార్క్ కామెడీపై తమిళనాట మంచి అంచనాలే ఉన్నాయి. నిజానికి డిసెంబర్ నెలాఖర్లోనే విడుదల కావాల్సిన ఈ సినిమా చెన్నై వరదలు సృష్టించిన బీభత్సం వల్ల ఫిబ్రవరికి వాయిదా పడింది. ఈ సినిమాను తెలుగులోనూ డబ్ చేసి విడుదల చేసేందుకు సిద్ధార్థ్ ప్రయత్నాలు చేస్తున్నారు. మార్చిలో తెలుగు వర్షన్ విడుదలయ్యే సూచనలు కనిపిస్తున్నాయి.