అక్కినేని ఫ్యామిలీ నుంచి త్వరలో హీరోగా పరిచయం కానున్న యంగ్ హీరో అక్కినేని అఖిల్. అఖిల్ నటిస్తున్న మొదటి సినిమా షూటింగ్ శరవేగంగా జరుగుతోంది. మాస్ పల్స్ తెలిసిన కమర్షియల్ డైరెక్టర్ వివి వినాయక్ దర్శకత్వం వహిస్తున్న ఈ సినిమాని శ్రేష్ఠ్ మూవీ బ్యానర్ పై నితిన్ ఫాదర్ సుధాకర్ రెడ్డి నిర్మిస్తున్నాడు. ఇటీవలే లాంగ్ స్పెయిన్ షెడ్యూల్ ని పూర్తి చేసుకున్న ఈ చిత్ర టీం మరో అవుట్ డోర్ షెడ్యూల్ కి సిద్దమైంది. థాయ్ లాండ్ లో జరగనున్న ఈ లేటెస్ట్ షెడ్యూల్ ఈ వారంలోనే ప్రారంభం కానుంది. త్వరలోనే ఈ చిత్ర టీం థాయ్ ల్యాండ్ వెళ్లనున్నారు.
ఇదిలా ఉంటే అక్కినేని అఖిల్ తన టీం పై ప్రశంశల జల్లు కురిపిస్తున్నారు. ‘మరో అవుట్ డోర్ షెడ్యూల్ కోసం ఈ వారమే థాయ్ ల్యాండ్ వెళ్తున్నాం. ఈ చిత్ర టీం తో కలిసి పనిచేయడం ఎంత అదృష్టమో మాటల్లో చెప్పలేను. వినయ్ గారు, ఆయన టీం అమేజింగ్. ముఖ్యంగా నిర్మాత సుధాకర్ రెడ్డి గారు, ఆయన టీం ఈ సినిమాకి అసలైన పిల్లర్స్.. ఇప్పటి వరకూ వాళ్ళిచ్చిన సపోర్ట్ కి నా స్పెషల్ థాంక్స్.. త్వరలోనే నేను చెప్పిన వీడియోని రిలీజ్ చేస్తామని’ అఖిల్ ట్వీట్ చేసాడు. ఇప్పటికే చాలా భాగం పూర్తిచేసుకున్న ఈ చిత్ర టీం థాయ్ ల్యాండ్ షెడ్యూల్ పూర్తి చేసుకొని మరో షెడ్యూల్ కోసం సౌత్ ఆఫ్రికా వెళ్లనుంది.
అఖిల్ సరసన సయేషా సైగల్ హీరోయిన్ గా పరిచయం కానుంది. అనూప్ రూబెన్స్ – ఎసెస్ తమన్ కలిసి ఈ సినిమాకి మ్యూజిక్ అందిస్తున్నారు.
