ముఖ్య అంశాలు
- తమిళనాడు శాసనసభలో జరిగిన బలపరీక్షలో సీఎం విజయ్ నేతృత్వంలోని టీవీకే ప్రభుత్వం 144 ఓట్లతో ఘన విజయం సాధించింది.
- ఈ ఓటింగ్లో కాంగ్రెస్, వీసీకేతో పాటు అన్నాడీఎంకే రెబల్ ఎమ్మెల్యేలు విజయ్కు మద్దతు పలకగా, డీఎంకే సభ్యులు సభ నుంచి వాకౌట్ చేశారు.
- లౌకిక విధానాలతో, సామాజిక న్యాయమే లక్ష్యంగా ఐదేళ్ల పాటు పూర్తిస్థాయి పాలన అందిస్తామని అసెంబ్లీ వేదికగా విజయ్ స్పష్టం చేశారు.
తమిళనాడు రాజకీయాల్లో దళపతి విజయ్ తనదైన మార్క్ చూపించారు. సినీ గ్లామర్ను పక్కనపెట్టి పూర్తిస్థాయి పాలిటిక్స్లోకి ఎంట్రీ ఇచ్చిన ఆయన, ఇప్పుడు ఏకంగా ముఖ్యమంత్రి హోదాలో అసెంబ్లీలో సత్తా చాటారు. తమిళనాడు నూతన సీఎంగా బాధ్యతలు చేపట్టిన టీవీకే (తమిళగ వెట్రి కళగం) అధినేత విజయ్.. బుధవారం జరిగిన బలపరీక్షలో స్పష్టమైన మెజారిటీతో నెగ్గారు.
సభలో స్పీకర్ ఒక్కో సభ్యుడి పేరు పిలుస్తూ ఓటింగ్ నిర్వహించగా, విజయ్ ప్రభుత్వానికి ఏకంగా 144 మంది ఎమ్మెల్యేలు మద్దతు పలికారు. కేవలం 22 మంది మాత్రమే వ్యతిరేకించారు. కాంగ్రెస్, వీసీకే, ఐయూఎంఎల్ పార్టీలతో పాటు అన్నాడీఎంకే రెబల్ ఎమ్మెల్యేలు సైతం ఏకగ్రీవంగా సీఎంకు అండగా నిలవడంతో టీవీకే సర్కార్ సునాయాసంగా గట్టెక్కింది.
అయితే, ఈ బలపరీక్ష అంత ఈజీగా ఏమీ జరగలేదు. సభ ఆద్యంతం వాడీవేడిగా సాగింది. ఓటింగ్ సమయంలో డీఎంకే సభ్యులు అసెంబ్లీ నుంచి వాకౌట్ చేశారు. అంతకుముందు జరిగిన చర్చలో అన్నాడీఎంకే అధినేత పళనిసామి తీవ్ర స్థాయిలో విమర్శలు గుప్పించారు. తమ ఎమ్మెల్యేలకు విజయ్ డబ్బులు ఆఫర్ చేశారని, బలపరీక్షకు ముందే వారిని కలవడం వెనుక కుట్ర దాగుందని ఆరోపించారు. కానీ, ఈ కామెంట్లను అన్నాడీఎంకే రెబల్ నేత వేలుమణి తిప్పికొట్టారు. తాము మనస్ఫూర్తిగా విజయ్కే మద్దతిస్తున్నట్లు సభలో క్లారిటీ ఇచ్చారు.
మరోవైపు డీఎంకే ఎమ్మెల్యే ఉదయనిధి స్టాలిన్ వంతు రాగానే సభలో మరింత హీట్ పెరిగింది. “తమిళనాడుకు రియల్ ప్రభుత్వం కావాలి, రీల్ ప్రభుత్వం కాదు” అంటూ ఆయన సెటైర్లు వేశారు. టీవీకేకి సొంతంగా మెజారిటీ లేదని, కేవలం కూటమి పార్టీల దయతోనే బతికిపోయారని విమర్శించారు. ఎమ్మెల్యేల కొనుగోళ్ల వల్లే రాష్ట్ర పరువు పోతోందని మండిపడిన ఉదయనిధి.. ఆ తర్వాత తన సభ్యులతో కలిసి సభను వీడారు.
ప్రతిపక్షాల విమర్శలన్నింటినీ విజయ్ చాలా కూల్గా హ్యాండిల్ చేశారు. సభలో చివరిగా మాట్లాడిన ఆయన.. తన ప్రభుత్వానికి అండగా నిలిచిన ప్రతి ఒక్కరికీ ధన్యవాదాలు తెలిపారు. “మా ప్రభుత్వం పూర్తి ఐదేళ్లు అధికారంలో ఉంటుంది. మతం రంగు పులమకుండా, పూర్తి లౌకిక విధానంతో రాష్ట్రాన్ని పాలిస్తాం. పాత ప్రభుత్వాలు తీసుకొచ్చిన సంక్షేమ పథకాలను ఆపబోం. ముఖ్యంగా మహిళల భద్రత, అందరికీ సామాజిక న్యాయం అందించడమే మా తొలి ప్రాధాన్యం” అని విజయ్ స్పష్టం చేశారు. ఇక వివాదాస్పదంగా మారిన ఓఎస్డీ (రాజకీయ) నియామకంపై వస్తున్న విమర్శలను సైతం పరిగణనలోకి తీసుకుంటామని, ఆ నిర్ణయాన్ని పునఃసమీక్షిస్తామని ఆయన హామీ ఇవ్వడంతో సభలో హర్షధ్వానాలు వినిపించాయి.
మొత్తం 234 స్థానాలున్న తమిళనాడు అసెంబ్లీలో టీవీకే 108 సీట్లు గెలుచుకుని సింగిల్ లార్జెస్ట్ పార్టీగా నిలిచిన విషయం తెలిసిందే. ఏదేమైనా.. ముఖ్యమంత్రిగా ఎదురైన తొలి అగ్నిపరీక్షను విజయ్ ఎలాంటి టెన్షన్ లేకుండా సక్సెస్ఫుల్గా దాటేశారు.
