ముఖ్య అంశాలు
- ఐపీఎల్ 2026 లీగ్ దశలో భాగంగా జరిగిన 66వ మ్యాచ్లో గుజరాత్ టైటాన్స్ చేతిలో 89 పరుగుల తేడాతో చెన్నై సూపర్ కింగ్స్ ఘోర పరాజయాన్ని చవిచూసింది.
- ఈ ఓటమితో చెన్నై సూపర్ కింగ్స్ ప్లేఆఫ్స్ రేసు నుంచి అధికారికంగా నిష్క్రమించగా, గుజరాత్ టైటాన్స్ పాయింట్ల పట్టికలో రెండో స్థానానికి చేరుకుంది.
- మొదట బ్యాటింగ్ చేసిన గుజరాత్ 229 పరుగులు చేయగా, కొండంత లక్ష్యంతో బరిలోకి దిగిన చెన్నై కేవలం 13.4 ఓవర్లలో 140 పరుగులకే కుప్పకూలింది.
ఐపీఎల్ 2026 సీజన్లో డిఫెండింగ్ ఛాంపియన్స్ చెన్నై సూపర్ కింగ్స్ కథ ముగిసింది. అహ్మదాబాద్లోని నరేంద్ర మోదీ స్టేడియం వేదికగా జరిగిన కీలకమైన 66వ లీగ్ మ్యాచ్లో గుజరాత్ టైటాన్స్ చేతిలో చెన్నై ఘోర పరాజయం పాలైంది. కచ్చితంగా గెలవాల్సిన మ్యాచ్లో రుతురాజ్ గైక్వాడ్ సేన చేతులెత్తేయడంతో 89 పరుగుల భారీ తేడాతో గుజరాత్ ఘన విజయం సాధించింది. ఈ ఓటమితో చెన్నై ప్లేఆఫ్స్ ఆశలు పూర్తిగా ఆవిరైపోగా, ఆడిన 14 మ్యాచ్లలో 9 విజయాలతో 18 పాయింట్లు సాధించిన గుజరాత్ టైటాన్స్ పట్టికలో రెండో స్థానాన్ని మరింత పదిలం చేసుకుంది.
గుజరాత్ భారీ స్కోరు.. చెన్నై బౌలర్ల వైఫల్యం
ఈ మ్యాచ్లో టాస్ గెలిచిన చెన్నై సూపర్ కింగ్స్ మొదట బౌలింగ్ ఎంచుకుంది. అయితే పిచ్ కండిషన్స్ను పూర్తిగా అనుకూలంగా మార్చుకున్న గుజరాత్ బ్యాటర్లు చెన్నై బౌలర్లపై విరుచుకుపడ్డారు. నిర్ణీత 20 ఓవర్లలో 4 వికెట్ల నష్టానికి 229 పరుగుల భారీ స్కోరు సాధించారు. సాయి సుదర్శన్ 53 బంతుల్లో 7 ఫోర్లు, 4 సిక్సర్లతో 84 పరుగులు చేయగా, కెప్టెన్ శుభ్మన్ గిల్ 64 పరుగులు, జోస్ బట్లర్ 57 పరుగులతో చెలరేగారు. చెన్నై బౌలర్లలో అన్షుల్ కాంబోజ్, ముఖేష్ చౌదరి చెరో వికెట్ పడగొట్టినప్పటికీ పరుగులను మాత్రం అడ్డుకోలేకపోయారు.
క్యూ కట్టిన సిఎస్కే బ్యాటర్లు
230 పరుగుల భారీ లక్ష్యంతో బరిలోకి దిగిన చెన్నై సూపర్ కింగ్స్ బ్యాటింగ్ లైన్ అప్ పూర్తిగా కుప్పకూలింది. గుజరాత్ బౌలర్ల ధాటికి చెన్నై బ్యాటర్లు క్రీజులో నిలదొక్కుకోలేకపోయారు. కేవలం 13.4 ఓవర్లలోనే 140 పరుగులకి చెన్నై ఆలౌట్ అయింది. శివం దూబే ఒక్కడే 17 బంతుల్లో 47 పరుగులతో వేగంగా ఆడినప్పటికీ, మిగిలిన వారెవరూ అతనికి సహకారం అందించలేదు. గుజరాత్ బౌలర్లలో కాగిసో రబడ, మహమ్మద్ సిరాజ్, రషీద్ ఖాన్ తలో మూడు వికెట్లు తీసి చెన్నై పతనాన్ని శాసించారు. ఈ ఘోర పరాజయంతో పాయింట్ల పట్టికలో 12 పాయింట్లతోనే నిలిచిపోయిన చెన్నై, టోర్నమెంట్ నుంచి అధికారికంగా ఎలిమినేట్ అయింది.