ముఖ్య అంశాలు
- తమిళనాడు ముఖ్యమంత్రిగా ఉన్న దళపతి విజయ్ను స్టార్ హీరోయిన్ సమంత చెన్నైలో మర్యాదపూర్వకంగా కలిశారు.
- ఈ కలయికకు సంబంధించిన ఫోటోను ఇన్స్టాగ్రామ్లో షేర్ చేసిన సామ్.. విజయ్ రాజకీయ ప్రయాణంపై ప్రశంసల వర్షం కురిపించారు.
- విజయ్ కేవలం తెరపై హీరోగా మిగిలిపోయే వ్యక్తి కాదని, ప్రజలకు సేవ చేయాలనే ఆయన సంకల్పం తనకు ఎంతో స్ఫూర్తినిచ్చిందని సమంత పేర్కొన్నారు.
కోట్లాది మంది అభిమానులను సంపాదించుకున్న దళపతి విజయ్.. తన సినీ కెరీర్ను పక్కనపెట్టి రాజకీయాల్లోకి ఎంట్రీ ఇచ్చిన విషయం తెలిసిందే. ప్రజల మద్దతుతో ముఖ్యమంత్రిగా ఉన్న ఆయనను సినీ ప్రముఖులు వరుసగా కలుస్తున్నారు. తాజాగా స్టార్ హీరోయిన్ సమంత చెన్నైలో సీఎం విజయ్ను కలిశారు. గతంలో ‘కత్తి’, ‘మెర్సల్’, ‘తేరి’ లాంటి బ్లాక్ బస్టర్ సినిమాల్లో విజయ్ సరసన నటించిన సమంత.. ఆయనతో తనకున్న అనుబంధాన్ని గుర్తుచేసుకుంటూ ఇన్స్టాగ్రామ్ వేదికగా ఓ ఎమోషనల్ పోస్ట్ పెట్టారు.
సమంత షేర్ చేసిన ఫోటో ఇప్పుడు నెట్టింట సెన్సేషన్గా మారింది. ఈ ఫోటోలో విజయ్ తెల్లటి షర్టులో హుందాగా కనిపిస్తుండగా, సమంత ఎరుపు రంగు చీరలో చాలా అందంగా ఉన్నారు. ఈ పిక్ పంచుకున్న సామ్.. “ఈరోజు చెన్నైలో అడుగుపెట్టగానే ఎంతో సంతోషంగా అనిపించింది. ఎందుకంటే మన సీఎంను కలవబోతున్నాను” అంటూ తన ఉత్సాహాన్ని వ్యక్తం చేశారు. విజయ్ సార్ కేవలం స్క్రీన్ మీద హీరోగా మిగిలిపోయే వ్యక్తి కాదని, ఆయన అంతకంటే గొప్ప స్థాయికి వెళ్తారని తాను ఎప్పుడూ నమ్ముతూ వచ్చానని రాసుకొచ్చారు. ఆయనలోని ఎనర్జీ చూస్తే ఎప్పుడూ అదే ఫీలింగ్ కలిగేదన్నారు.
“ఇప్పటికే ఒక రంగంలో అత్యున్నత శిఖరాలకు చేరుకున్న మీరు.. ప్రజలకు సేవ చేయడం కోసం, ఒక గొప్ప మార్పు తీసుకురావడం కోసం దాన్ని వదిలేసి రాజకీయాల్లోకి రావడం నిజంగా సామాన్యమైన విషయం కాదు. ఇది అంత సులువైన నిర్ణయం కాకపోయినా, ఎంతో రిస్క్ ఉన్నా సరే మీరు ముందుకెళ్లారు. ఆ ధైర్యమే నాకు ఎంతో స్ఫూర్తినిచ్చింది” అని సమంత పేర్కొన్నారు. మనం సమాజానికి ఏం చేస్తున్నామనేది చాలా తక్కువ మంది మాత్రమే ఆలోచిస్తారని, ఆ కోవలోనే విజయ్ సార్ ఈ నిర్ణయం తీసుకున్నారని సామ్ కొనియాడారు.
ఆయన ఆలోచనా విధానం, ప్రజలకు ఏదైనా చేయాలనే తపన.. ఆయన్ని నమ్మేవాళ్లందరినీ కచ్చితంగా ఆశ్చర్యపరుస్తుందని సమంత ధీమా వ్యక్తం చేశారు. రాబోయే రోజుల్లో ఆ దేవుడు ఆయనకు మరింత బలాన్ని, ధైర్యాన్ని ఇవ్వాలని మనస్ఫూర్తిగా కోరుకుంటున్నట్లు తెలిపారు. సమంత పెట్టిన ఈ హృదయపూర్వక పోస్ట్ చూసి ఇటు విజయ్ ఫ్యాన్స్, అటు సామ్ అభిమానులు ఫుల్ ఖుషీ అవుతున్నారు. సోషల్ మీడియాలో ఈ పిక్ టాక్ ఇప్పుడు ట్రెండింగ్గా మారింది.