యష్ రాజ్ ఫిల్మ్స్ ప్రతిష్టాత్మకంగా ప్లాన్ చేసిన ‘వైఆర్ఎఫ్ స్పై యూనివర్స్’ (YRF Spy Universe) నుండి వస్తున్న తొలి మహిళా ప్రధాన యాక్షన్ చిత్రం ‘ఆల్ఫా’ పై బాలీవుడ్‌లో మంచి అంచనాలు ఉన్నాయి. ఆలియా భట్, శర్వరి ప్రధాన పాత్రల్లో నటిస్తున్న ఈ హై-వోల్టేజ్ యాక్షన్ థ్రిల్లర్ అడ్వాన్స్ బుకింగ్స్ దేశవ్యాప్తంగా ఓపెన్ అయ్యాయి. బుకింగ్స్ ప్రారంభంలో రెస్పాన్స్ సాధారణంగానే ఉన్నా, రిలీజ్ డేట్ దగ్గరపడుతుండటంతో టికెట్ల అమ్మకాలు క్రమంగా పెరుగుతున్నాయి.

ప్రముఖ బాక్సాఫీస్ ట్రాకింగ్ సైట్ శాక్‌నిల్క్ (Sacnilk) లెక్కల ప్రకారం.. మొదటి రోజు ప్రదర్శనల కోసం దేశవ్యాప్తంగా 3,617 షోలకు గాను ఇప్పటివరకు 18,721 టికెట్లు అమ్ముడయ్యాయి. దీని ద్వారా దాదాపు రూ. 70.25 లక్షల గ్రాస్ (బ్లాక్ సీట్లు కాకుండా) వసూలైంది. ఒకవేళ థియేటర్ యాజమాన్యాలు బ్లాక్ చేసిన సీట్లను కూడా కలుపుకుంటే, తొలి రోజు అడ్వాన్స్ గ్రాస్ కలెక్షన్ రూ. 2.1 కోట్లకు చేరింది. ప్రస్తుతం దేశవ్యాప్తంగా 19 షోలు దాదాపు హౌస్‌ఫుల్ కాగా, మరో 31 షోలు ఫాస్ట్ ఫిల్లింగ్ అవుతున్నాయి. బుకింగ్స్ ఇంకా ప్రాథమిక దశలోనే ఉండటంతో రానున్న రోజుల్లో ఈ నంబర్స్ మరింత పెరిగే అవకాశం కనిపిస్తోంది.

నగరాల వారీగా అడ్వాన్స్ సేల్స్ ఎలా ఉన్నాయి?

ప్రాంతాల వారీగా చూస్తే దేశ రాజధాని ప్రాంతం (ఢిల్లీ ఎన్‌సీఆర్) రూ. 17.52 లక్షల గ్రాస్‌తో ప్రస్తుతానికి టాప్‌లో ఉంది. ఇక్కడ బ్లాక్ సీట్లతో కలిపి ఈ మొత్తం రూ. 45 లక్షల వరకు చేరింది. ఆ తర్వాతి స్థానంలో ముంబై నిలిచింది. ముంబైలో 297 షోల ద్వారా రూ. 11.34 లక్షల (బ్లాక్ సీట్లతో కలిపి రూ. 30.82 లక్షలు) గ్రాస్ వసూలైంది.

ఇక సౌత్ మార్కెట్ల విషయానికి వస్తే, హైదరాబాద్‌లో 143 షోల ద్వారా రూ. 5.52 లక్షలు వసూలు కాగా, బెంగళూరులో 189 షోల నుండి రూ. 4.60 లక్షలు వచ్చాయి. అలాగే కోల్‌కతాలో రూ. 3.59 లక్షలు, పుణెలో రూ. 3.07 లక్షల చొప్పున కలెక్ట్ అయ్యాయి. చెన్నై నగరంలో తక్కువ థియేటర్లలో (కేవలం 41 షోలు) విడుదలవుతుండటంతో అక్కడ 12 శాతం ఆక్యుపెన్సీ కనిపిస్తోంది. కోయంబత్తూరులో 9 శాతం, హైదరాబాద్‌లో 5 శాతం, పాట్నాలో 10 శాతం చొప్పున ఆక్యుపెన్సీ నమోదైంది.

రాష్ట్రాల పరంగా ఢిల్లీ తర్వాత మహారాష్ట్ర రూ. 16.98 లక్షలతో ముందంజలో ఉంది. తెలంగాణ నుండి ఇప్పటివరకు రూ. 5.64 లక్షలు రాగా, కర్ణాటక, పశ్చిమ బెంగాల్ రాష్ట్రాలు చెరో రూ. 4 లక్షల మార్కును దాటాయి.

శివ్ రావల్ దర్శకత్వం వహిస్తున్న ఈ సినిమాలో ఆలియా భట్, శర్వరిలతో పాటు అనిల్ కపూర్, బాబీ డియోల్ కీలక పాత్రల్లో నటిస్తున్నారు. వీరికి తోడు స్టార్ హీరో హృతిక్ రోషన్ కూడా ఇందులో ఓ ముఖ్యమైన రోల్‌లో కనిపించనుండటం విశేషం. స్పై యూనివర్స్ సినిమాలకు ఉండే క్రేజ్ దృష్ట్యా, రాబోయే రోజుల్లో స్పాట్ బుకింగ్స్ మరియు అడ్వాన్స్ సేల్స్ మరింత వేగం పుంజుకునే అవకాశం ఉంది.