శర్వానంద్ హీరోగా నటించిన తాజా చిత్రం ‘బైకర్’ బాక్సాఫీస్ వద్ద దూసుకుపోతోంది. భారతదేశపు మొట్టమొదటి మోటోక్రాస్ స్పోర్ట్స్ డ్రామాగా రూపొందిన ఈ చిత్రం, విడుదలైన ఐదు రోజుల్లోనే అద్భుతమైన వసూళ్లను సాధిస్తోంది. సాధారణంగా వీక్ డేస్లో సినిమాల కలెక్షన్లు తగ్గుతుంటాయి, కానీ ఈ చిత్రం మాత్రం రోజురోజుకూ పుంజుకుంటూ ట్రేడ్ వర్గాలను సైతం ఆశ్చర్యపరుస్తోంది.
ఈ సినిమాకు లభిస్తున్న మౌత్ టాక్ కారణంగా బుకింగ్స్ భారీగా పెరుగుతున్నాయి. సోమవారం నాడు బుక్మైషోలో 15.6 వేల టిక్కెట్లు అమ్ముడవ్వగా, మంగళవారం ఆ సంఖ్య ఏకంగా 17.2 వేలకు చేరడం విశేషం. భారీ పోటీ ఉన్నప్పటికీ, ప్రేక్షకులు ఈ హై-ఓల్టేజ్ యాక్షన్ డ్రామాపై చూపిస్తున్న ఆసక్తి సినిమా విజయానికి సంకేతంగా నిలుస్తోంది.
అభిలాష్ రెడ్డి కంకర దర్శకత్వంలో, యూవీ క్రియేషన్స్ నిర్మించిన ఈ చిత్రంలో మాళవిక నాయర్, డాక్టర్ రాజశేఖర్, అతుల్ కుల్కర్ణి కీలక పాత్రల్లో నటించారు. ముఖ్యంగా జిబ్రాన్ అందించిన నేపథ్య సంగీతం రేసింగ్ సీక్వెన్స్లకు ప్రాణం పోసిందని ప్రేక్షకులు ప్రశంసిస్తున్నారు.