సూపర్ స్టార్ మహేష్ బాబు హీరోగా తెరకెక్కుతున్న సినిమా ‘ఆగడు’. ప్రస్తుతం ఈ సినిమా షూటింగ్ హైదరాబాద్లో జరుగుతోంది. ఈ మధ్య హైదరాబాద్లోని అల్యూమినియం ఫ్యాక్టరీ వద్ద జరిగిన షూటింగ్ లో మహేష్ బాబు నాలుగు రోజుల పాటు పాల్గొన్నాడు. ప్రస్తుతం బ్రహ్మానందం, మరికొంత మంది కామెడీ నటులపై కొన్ని సన్నివేశాలను చిత్రీకరిస్తున్నారు. ఈ సినిమాకి శ్రీనువైట్ల దర్శకత్వం వహిస్తున్నాడు. మహేష్ బాబుతో ఆయన తీస్తున్న రెండవ సినిమా ఇది. శ్రీనువైట్ల తీసిన గత సినిమాలను బట్టి చూస్తే ఈ సినిమాలో కూడా ఎంటర్టైన్మెంట్ ఎక్కువ శాతం ఉండవచ్చునని బావిస్తున్నారు. ఈ సినిమాలో బ్రహ్మానందం ఒక ముఖ్యమైన పాత్రలో కనిపించనున్నాడు. మహేష్ బాబు మరొకసారి పోలీసు ఆఫీసర్ గా కనిపించనున్నాడు. ఈ సినిమాలో మహేష్ బాబు సరసన మొదటి సారిగా తమన్నా నటిస్తోంది. తాజా సమాచారం ప్రకారం మహేష్ బాబు ఈ సినిమా షూటింగ్ లో జనవరి 15 నుండి పాల్గొంటాడు. థమన్ సంగీతాన్ని అందిస్తున్న ఈ సినిమా 14 రీల్స్ ఎంటర్టైన్మెంట్ బ్యానర్ పై అనిల్ సుంకర, గోపీచంద్, రామ్ ఆచంట నిర్మిస్తున్నారు.