విక్టరీ వెంకటేష్, స్టార్ డైరెక్టర్ త్రివిక్రమ్ శ్రీనివాస్ కాంబినేషన్లో వస్తున్న ‘ఆదర్శ కుటుంబం’ చిత్రం గురించి ఒక ఆసక్తికరమైన అప్డేట్ బయటకు వచ్చింది. ‘మీర్జాపూర్’ వెబ్ సిరీస్లో మున్నా భయ్యా పాత్రతో దేశవ్యాప్తంగా గుర్తింపు పొందిన బాలీవుడ్ నటుడు దివ్యేందు శర్మ, ఈ సినిమాలో ఒక కీలక పాత్ర పోషిస్తున్నాడట. స్వయంగా ఆయనే ఒక ఇంటర్వ్యూలో ఈ విషయాన్ని వెల్లడించాడు.
దివ్యేందు శర్మకు తెలుగు ప్రేక్షకుల్లో కూడా మంచి క్రేజ్ ఉంది. ఆయన ఇప్పటికే రామ్ చరణ్ నటిస్తున్న ‘పెద్ది’ చిత్రంతో టాలీవుడ్ ఎంట్రీ ఇస్తుండగా, ఇప్పుడు వెంటనే వెంకటేష్-త్రివిక్రమ్ సినిమాలో అవకాశం దక్కించుకోవడం విశేషం. ఫ్యామిలీ క్రైమ్ డ్రామాగా తెరకెక్కుతున్న ఈ చిత్రం ప్రస్తుతం ప్రొడక్షన్ దశలో ఉంది.
హారిక అండ్ హాసిని క్రియేషన్స్ పతాకంపై చినబాబు నిర్మిస్తున్న ఈ సినిమాకు ఎస్.ఎస్. తమన్ సంగీతాన్ని అందిస్తున్నాడు. శ్రీనిధి శెట్టి హీరోయిన్గా నటిస్తున్న ఈ చిత్రాన్ని దసరా కానుకగా విడుదల చేసేందుకు చిత్ర బృందం ప్లాన్ చేస్తోంది. మరి ఈ సినిమాలో మున్నా భయ్యా ఎలాంటి పాత్రలో కనిపిస్తాడో చూడాలి.