డ్రీమ్ టీమ్ ప్రొడక్షన్స్ బ్యానర్పై హరనాథ్ పోలిచర్ల హీరోగా నటిస్తూ, స్వయంగా రచన, దర్శకత్వం, నిర్మాణ బాధ్యతలు వహించిన చిత్రం ‘నా తెలుగోడు’. తనికెళ్ళ భరణి, జరీనా వహాబ్, రఘు బాబు, సుఫియా తన్వీర్, నైరా పాల్ కీలక పాత్రల్లో నటించిన ఈ సినిమా డిసెంబర్ 12న ప్రపంచవ్యాప్తంగా విడుదలకు సిద్ధమవుతోంది. ఈ సందర్భంగా చిత్ర బృందం ప్రీ రిలీజ్ ఈవెంట్ను ఘనంగా నిర్వహించింది.
ఈ కార్యక్రమానికి ముఖ్య అతిథులుగా విచ్చేసిన దర్శకుడు శివ నిర్వాణ, మైత్రి నవీన్, దర్శకుడు మహేష్ బాబు.. అమెరికాలో వైద్యుడిగా బిజీగా ఉంటూనే, సినిమాపై ఉన్న మక్కువతో హరనాథ్ సినిమాలు చేయడాన్ని ప్రశంసించారు. డ్రగ్స్ రహిత సమాజం కోసం, సామాజిక బాధ్యతతో ఈ చిత్రాన్ని తెరకెక్కించారని కొనియాడారు. ఈ సినిమా మంచి విజయం సాధించాలని ఆకాంక్షించారు.
హీరో, దర్శకుడు హరనాథ్ పోలిచర్ల మాట్లాడుతూ.. స్వర్గీయ ఎన్టీఆర్ తనకు స్ఫూర్తి అని, ఆయన ఆశీర్వాదంతోనే ఈ సినిమా చేశానని తెలిపారు. అమ్మ ప్రేమ, డ్రగ్స్పై అవగాహన, సైనికుడి జీవితం, ఆడబిడ్డ రక్షణ అనే నాలుగు ప్రధాన అంశాల చుట్టూ ఈ కథ నడుస్తుందని చెప్పారు. సమాజానికి మంచి సందేశాన్నిచ్చే ఈ చిత్రాన్ని ప్రేక్షకులందరూ ఆదరించాలని కోరారు. చిత్ర హీరోయిన్లు సుఫియా తన్వీర్, నైరా పాల్ తమ పాత్రలపై ఆనందం వ్యక్తం చేశారు.
