క్రికెట్, సినిమా రంగాల కలయికతో ‘టాలీవుడ్ ప్రో లీగ్’ (TPL) గ్రాండ్గా ప్రారంభమైంది. హైదరాబాద్లోని నోవాటెల్ హోటల్లో జరిగిన ఈ వేడుకలో లెజెండరీ క్రికెటర్లు కపిల్ దేవ్, వీరేంద్ర సెహ్వాగ్, సురేష్ రైనా ముఖ్య అతిథులుగా పాల్గొని లీగ్ లోగో, జెర్సీ మరియు విజేతల ట్రోఫీని ఆవిష్కరించారు. నటుడు వంశీ చాగంటి, ఈబిజీ గ్రూప్ ప్రతినిధులు ఇర్ఫాన్ ఖాన్, హరి సంయుక్తంగా ఈ క్రీడా వేడుకను ఏర్పాటు చేశారు.
కేవలం స్టార్ హీరోలకే పరిమితం కాకుండా, చిత్ర పరిశ్రమలోని 24 శాఖలకు చెందిన ప్రతిభావంతులైన క్రికెటర్లను ఒకే వేదికపైకి తీసుకురావడమే ఈ లీగ్ ప్రధాన ఉద్దేశం. ప్రముఖ నిర్మాత దిల్ రాజు ఈ ఆలోచనను మెచ్చుకుంటూ, దీనిని తెలుగు సినిమా ‘అలయ్-బలయ్’గా అభివర్ణించారు. ఈ లీగ్ ద్వారా వచ్చే ఆదాయంలో కొంత భాగాన్ని వెల్ఫేర్ కార్యక్రమాలకు ఖర్చు చేయనున్నట్లు నిర్వాహకులు ప్రకటించారు.
ఫిబ్రవరి 13, 14, 15 మరియు 21, 22 తేదీల్లో ఉప్పల్ స్టేడియం వేదికగా ఈ పోటీలు జరగనున్నాయి. మొత్తం ఆరు జట్లు తలపడనున్న ఈ టోర్నీలో, ఆయా జట్లకు టాలీవుడ్లోని ప్రముఖ నిర్మాణ సంస్థలు యజమానులుగా వ్యవహరిస్తాయి. ఈ కార్యక్రమంలో సోనూ సూద్, రాశీ ఖన్నా, తమన్, అనిల్ రావిపూడి, ప్రశాంత్ వర్మ వంటి పలువురు సినీ ప్రముఖులు పాల్గొని సందడి చేశారు.
