కొచ్చిలో ఒకే సమయంలో రెండు వేర్వేరు చిత్రాల ప్రెస్మీట్లు షెడ్యూల్ కావడం వివాదానికి దారితీసింది. కన్నడ చిత్రం ‘కొరగజ్జ’ ప్రచార కార్యక్రమం కోసం చిత్ర బృందం జనవరి 24న కొచ్చిలోని హాలిడే ఇన్ను వేదికగా ఎంచుకుంది. అయితే అదే సమయానికి నటుడు మమ్ముట్టి నటిస్తున్న మరో మలయాళ చిత్ర ఈవెంట్ ఖరారు కావడంతో, మీడియా ప్రతినిధుల కొరత ఏర్పడి ‘కొరగజ్జ’ ప్రెస్మీట్ను వాయిదా వేయాల్సి వచ్చింది.
ఈ కార్యక్రమం కోసం సీనియర్ నటుడు కబీర్ బేడీ, నటి భవ్య ప్రత్యేకంగా కొచ్చికి చేరుకున్నారు. వారం రోజుల ముందే సమాచారం ఇచ్చినప్పటికీ, చివరి నిమిషంలో ఇలాంటి పరిస్థితి ఎదురవ్వడంపై దర్శకుడు సుధీర్ అత్తావర్, నిర్మాత త్రివిక్రమ్ సపాల్య తీవ్ర అసంతృప్తి వ్యక్తం చేశారు. పరిశ్రమలోని పీఆర్ బృందాల మధ్య సరైన సమన్వయం లేకపోవడం వల్లే ఈ సమస్య తలెత్తిందని వారు అభిప్రాయపడ్డారు.
దేశవ్యాప్తంగా ‘కొరగజ్జ’ ప్రచారానికి మంచి స్పందన లభిస్తోందని, కానీ కొచ్చిలో ఇలా జరగడం బాధాకరమని కబీర్ బేడీ పేర్కొన్నారు. సినీ పరిశ్రమలో ఒకరి పట్ల ఒకరికి గౌరవం ఉండాలని, మెరుగైన కమ్యూనికేషన్ ద్వారా ఇలాంటి షెడ్యూల్ సమస్యలను నివారించవచ్చని ఆయన సూచించారు.