విడుదల తేదీ : జనవరి 02, 2026
స్ట్రీమింగ్ వేదిక : నెట్ఫ్లిక్స్
123తెలుగు.కామ్ రేటింగ్ : 3.25/5
నటీనటులు : సందీప్ ప్రదీప్, వినీత్, నరైన్, బిను పప్పు, అశోకన్ తదితరులు
దర్శకుడు : దింజిత్ అయ్యథన్
నిర్మాత : ఎంఆర్కె జయరామ్
సంగీత దర్శకుడు : ముజీబ్ మజీద్
సినిమాటోగ్రాఫర్ : బాహుల్ రమేష్
ఎడిటర్ : సూరజ్ ఈ ఎస్
సంబంధిత లింక్స్ : ట్రైలర్
మలయాళంలో తెరకెక్కిన మిస్టరీ థ్రిల్లర్ చిత్రం ‘ఎకో’ ప్రస్తుతం ప్రముఖ ఓటీటీ ప్లాట్ఫామ్ నెట్ఫ్లిక్స్లో స్ట్రీమింగ్కు వచ్చింది. మరి ఈ సినిమా ప్రేక్షకులను ఎంతమేర ఆకట్టుకుందో ఈ రివ్యూలో చూద్దాం.
కథ:
కేరళలోని అడవి ప్రాంతమైన కాట్టుకున్ణు నేపథ్యంగా సాగుతుంది ఈ కథ. మలేషియాకు చెందిన మ్లాతి (బియానా మోమిన్) అలియాస్ సోయి, ఒంటరిగా జీవిస్తూ ఉంటుంది. ఆమెను చూసుకునే బాధ్యతను ఆమె కుమారులు నియమించిన పీయూస్ (సందీప్ ప్రదీప్) తీసుకుంటాడు. అతనితో పాటు మలేషియన్ బ్రీడ్కు చెందిన శిక్షణ పొందిన కుక్కలు కూడా ఉంటాయి. ఇదిలా ఉండగా, కొన్నేళ్ల క్రితం ఒక క్రిమినల్ కేసులో చిక్కుకుని కనిపించకుండా పోయిన కుక్కల పెంపకదారు కురియాచన్ (సౌరభ్ సచ్దేవ్) కోసం చాలా మంది వెతుకుతుంటారు. అతని సన్నిహితుడు మోహన్ పొతన్ (వినీత్) కూడా అతని జాడ కోసం ప్రయత్నించే వారిలో ఒకరు. అడవిలో ఎక్కడో తన శిక్షణ పొందిన కుక్కల సహాయంతో కురియాచన్ దాక్కున్నాడనే అనుమానం ఉన్నా, అతని ఆచూకీ మాత్రం ఎవరికీ తెలియదు. అసలు కురియాచన్ను అంత మంది ఎందుకు వెతుకుతున్నారు? పీయూస్కి, కుక్కలకు ఇందులో ఎలాంటి పాత్ర ఉంది? మలేషియాకు చెందిన ఓ మహిళ కేరళ అడవుల్లో ఒంటరిగా ఎలా జీవిస్తోంది? అనే ప్రశ్నలకు సమాధానమే ఈ చిత్ర కథ.
ప్లస్ పాయింట్స్:
‘ఎకో’ వాతావరణాన్ని ఆయుధంగా చేసుకుని మిస్టరీని నడిపించిన సినిమా. రచయిత బాహుల్ రమేష్, దర్శకుడు దింజిత్ అయ్యథాన్ కలిసి అడవుల నిశ్శబ్దం, ఒంటరి ఇల్లు, కుక్కల ఉనికి, అంతటా పరచుకున్న అసౌకర్యకరమైన మూడ్లతో కథను మెల్లగా కానీ బలంగా ఉత్కంఠ వైపు నడిపించారు. భయాన్ని చూపించకుండా, అనుభూతి పరచడంలో ఈ సినిమా విజయం సాధించింది.
కథ తాలూకు మౌలిక రేఖ చాలా సరళంగా కనిపించినా, దానికి అసలు ప్రాణం నాన్-లీనియర్ కథనశైలి, సూటిగా కాకుండా పొరలుగా సాగిన స్క్రీన్ప్లేనే. స్లో బర్న్ టోన్ ఉన్నప్పటికీ, ప్రతి సన్నివేశం తర్వాత ఏమి బయటపడుతుందన్న ఉత్సుకతను ప్రేక్షకుడిలో నిలిపేలా ఉంటుంది.
మలేషియా నేపథ్యంతో వచ్చే సన్నివేశాలు, కురియాచన్–సోయి గతాన్ని తడిమే ఎపిసోడ్లు, చివర్లో క్రమంగా విప్పే క్లైమాక్స్ లేయర్లు కథకు బలాన్ని చేకూర్చాయి. ఈ మొత్తం ప్రయాణంలో బ్యాక్గ్రౌండ్ స్కోర్ కీలక పాత్ర పోషిస్తూ, టెన్షన్ను పెంచి ప్రేక్షకుడిని కథలో పూర్తిగా లీనమయ్యేలా చేస్తుంది.
నటీనటుల పరంగా చూస్తే, అండర్డాగ్ పాత్రలో సందీప్ ప్రదీప్ మితంగా, నియంత్రిత నటనతో ఆకట్టుకున్నాడు. సంభాషణలు తక్కువగానే ఉన్నా, బియానా మోమిన్ తన హావభావాలతో భావోద్వేగాలను బలంగా వ్యక్తపరిచింది. వినీత్ తన పాత్రకు సహజత్వాన్ని తీసుకురాగా, దర్యాప్తు అధికారి పాత్రలో నారాయణ్ విశ్వసనీయంగా కనిపించాడు. ఇతర నటీనటులు కూడా కథకు అవసరమైన స్థాయిలో మంచి సహకారం అందించారు.
మైనస్ పాయింట్స్:
నాన్-లీనియర్ కథనశైలి, విభిన్న దృష్టికోణాల నుంచి సాగే నెరేషన్ కారణంగా సినిమా మొదటి భాగంలో కొంత గందరగోళంగా అనిపించే అవకాశముంది. ఒకేసారి ప్యారలల్గా నడిచే సబ్ప్లాట్స్ వల్ల కొన్ని చోట్ల పేస్ స్లో అయినట్లు అనిపిస్తుంది. కథలోని ప్రతి పొరను అర్థం చేసుకోవాలంటే ప్రేక్షకుడి నుంచి ఓపికను కోరుకుంటుంది.
అదే సమయంలో, దర్శకుడు ఉద్దేశపూర్వకంగా అనేక ప్రశ్నలకు స్పష్టమైన సమాధానాలు ఇవ్వకుండా వదిలేస్తాడు. కురియాచన్ నిజంగా ఉన్నాడా? అతను బ్రతికే ఉన్నాడా? అన్న అంశాలపై ప్రత్యక్ష ఆధారాలు చూపించడు. అడవిలోకి వెళ్లిన తర్వాత అతను కనిపించకపోవడంతో, క్లైమాక్స్ కూడా ఖచ్చితమైన ముగింపుని ఇవ్వకుండా భావనాత్మక అర్థాలకే చోటిస్తుంది. స్పష్టమైన, క్లియర్ ఎండింగ్ ఆశించే ప్రేక్షకులకు ఇది కొంత అసంతృప్తిని కలిగించే అవకాశం ఉంది.
సాంకేతిక విభాగం:
ఈ సినిమాకు అసలైన బలం బాహుల్ రమేష్ రచన. డైలాగ్స్పై కాకుండా, వాతావరణం మరియు కథన నిర్మాణంపైనే ఆధారపడి సస్పెన్స్ను నిలబెట్టే విధానం ప్రశంసనీయం. దర్శకుడు దింజిత్ అయ్యథాన్ కూడా ఈ స్క్రిప్ట్ను అతిగా కాకుండా, చాలా కంట్రోల్తో తెరకెక్కించాడు. సినిమాటోగ్రఫీ బాధ్యతను కూడా బాహుల్ రమేష్ స్వయంగా నిర్వహించడంతో, ప్రతి ఫ్రేమ్లో ఏమి చూపించాలి, ఏ భావాన్ని ఎలా వ్యక్తపరచాలి అన్న స్పష్టత కనిపిస్తుంది. విజువల్స్ మొత్తం సినిమాకు అవసరమైన డార్క్, మిస్టీరియస్ మూడ్ను బలంగా నిలబెడతాయి. ముజీబ్ మజీద్ అందించిన బ్యాక్గ్రౌండ్ స్కోర్ స్లో ఉత్కంఠను జోడిస్తూ, కథలో ప్రేక్షకుడిని మరింత లీనమయ్యేలా చేస్తుంది. నిర్మాణ విలువలు కూడా కథకు సరిపోయేలా ఉన్నాయి.
తీర్పు:
ఓవరాల్గా చూస్తే.. ఎకో ఒక ఎంగేజింగ్ మిస్టరీ థ్రిల్లర్గా ప్రేక్షకులను ఆకట్టుకుంటుంది. నటీనటుల పర్ఫార్మెన్స్లు ప్రేక్షకులను ఆకట్టుకుంటాయి. ఇక ఈ సినిమాకు మేజర్ బలంగా ఈ చిత్ర రైటింగ్, దాని ఎగ్జిక్యూషన్ నిలుస్తుంది. ఈ చిత్ర నెరేషన్, ట్రీట్మెంట్ కాస్త కన్ఫ్యూజింగ్గా అనిపించినా, సినిమా సాగుతున్న కొద్ది ఆసక్తి క్రియేట్ అవుతుంది. ఓటీటీలో ఇటీవల ప్రేక్షకులు ఎంజాయ్ చేసే మిస్టరీ థ్రిల్లర్ చిత్రాల్లో ఇది ఖచ్చితంగా ఉంటుంది.
123telugu.com Rating: 3.25/5
Reviewed by 123telugu Team